#ParentLicenses1975

今天仔仔身體不適，所以帶咗佢去兒科診所睇醫生。一入到去間診所，有一條長嘅「L」形沙發，環境一如既往令人覺得好乾淨、好整齊

當時診所裏邊有一個姑娘、一個媽媽、一對小朋友，以及兩位工人姐姐喺度。當中小朋友是一個男孩子和一個女孩子，男孩子目測大約1, 2歲，女孩子目測大約4, 5歲。每個小朋友都分別有一個工人姐姐傍住，而媽媽就企咗喺度講電話

觀察到女孩子都較乖，佢同工人姐姐揀書睇；反觀男孩子就拖住工人姐姐，着住對鞋企喺沙發，再由沙發頭跑到沙發尾

其實條沙發係大「L」形，呎吋都幾長，所以該男孩子玩得好興奮

入到診所嘅我就即刻感覺好無奈，因為我覺得鞋底好污糟，佢咁樣踩，我同仔仔可以坐邊度？加上我兩歲嘅仔仔又唔舒服，我都想佢坐低唞吓

我知道個媽媽雖然講緊電話，但其實係見到，因為我見住佢對眼係望住佢個仔喺度跑

及後，我二話不說去咗同姑娘講：「麻煩俾啲紙巾同埋消毒火酒我，我要抹下張梳化」

可是因為冇火酒嘅緣故，姑娘就俾咗滴露我。我見到姑娘個樣都好無奈，因為成間診所得佢一個人，佢又要打電話，又要整藥，又要攞針，所以我都避免麻煩佢

我相信係由於我抹沙發的舉動，個媽媽終於見到，佢終於示意工人唔好再俾阿仔喺沙發上面跑

小朋友即刻喊同扭計，然後我見到佢阿媽望咗我一眼，個感覺重要好嫌棄咁

然而，另一位女孩子就乖乖同工人姐姐一齊睇故事書，所以對比都幾大

謹希望各位家長，就算唔係疫情緣故，其實鞋底都真係好污糟，可唔可以在公共場所有返啲公德心？特別於人哋會坐嘅地方，例如地鐵座位、巴士座位、診所沙發等等，不要再讓小朋友着住鞋企上去或者跑，真係會影響咗其他人

喺你面前抹，你又會玻璃心，轉頭可能俾人話返「咁驚唔好出街」。但將心比己，你會唔會用對鞋踩你自己件衫先？你會唔會坐地下？會唔會俾小朋友摸自己污糟嘅鞋底？

讀者投稿@一個兩歲男孩的媽媽