#ParentLicenses1958

於9月27日，約下午5時，在荃灣公園1:1恐龍旁邊

我孭住細仔，同3歲女兒一齊企定影相時，忽然有個約4, 5歲嘅女孩跑住無睇路咁衝埋嚟，兜口兜面撞咗落我個女度。我個女垂直跌落地，重要係後腦落地，擦損手仔

我個女即時爆喊，攬住我。我同老公即時檢查女兒頭部，無表面傷痕，就只係喊得勁大聲

而撞到人嘅4, 5歲小朋友已經跑返去佢媽媽度。佢媽咪見到我女喊，係同我相反方向行開，然後小朋友繼續跑嚟跑去，媽咪又想搵個女咁

於是我抱住喊緊嘅女走過去同對方講：「你小朋友撞到我小朋友，你見到被你小朋友撞親嘅喊成咁，係咪應該過嚟了解下？」

對方回應：「我無目擊過程，個女有話撞到人，我有問佢有冇講『對唔住』，佢話『有』。同埋我個女而家行開咗，我都未了解到件事」

其實就算無目擊到，但對方女兒有同媽媽講，況且我女喊到勁大聲，我覺得都唔應該行咗去

之後，佢去咗搵個女過嚟一齊了解事情。佢叫咗個女5-6分鐘，個女都唔肯過嚟，後來重喊晒

直至到我個女都痛完，無再喊，我就叫我個女去同姐姐講：「我痛完，而家唔痛，我哋下次一齊小心啲，你都唔好喊」

然而，我個女到臨瞓時都重話個頭痛，問我：「係咪瞓醒會唔痛？」

其實我想話，小朋友喺公園跑跑跳跳，碰撞常有發生，我無怪責跑嘅小朋友，喺公園唔跑，唔通喺圖書館跑咩

但做家長嘅如果自己小朋友整到人、撞到人，而且唔係輕微碰撞喎，係成個人落地，好應該上前了解下、慰問下，睇下對方有無事，並不是睇到當睇唔到，聽到人哋大喊都當無事發生

其實只係一句道歉同慰問，作為家長真係做唔到？幾歲小朋友撞到人，人哋喊到勁大聲，其實小朋友驚都正常，當然唔會識處理，大人就係更加要好好睇住小朋友，協助處理緊急情況

圖片來源@LIHKG
讀者投稿@心痛媽媽