#ParentLicenses1894

話說，我同老公經過離島區某屋苑街市門口時見到4個小妹妹，目測為三個3歲及一個2歲，周圍都唔見佢哋父母/照顧者

當時情景係三個3歲圍著個全身趴喺地上嘅2歲，重細聲講大聲笑，又翹手又叉腰。大概經過5秒後，突然有個目測18-22歲紮丸子頭嘅女子走咗過去，佢一手拉起趴喺地上嘅妹妹

女子問：「做乜瞓地下？」
（我想講街市範圍真係好唔衛生，好污糟囉！）

趴地妹妹話：「係姐姐叫」

女子隨即質問其餘三個：「做咩蝦佢？！」

我唔清楚幾位小朋友係唔係識得或者有咩關係，亦都唔清楚嗰位女子係唔係媽媽。只不過既然見有人處理緊，我同老公又趕時間，就冇留意到後續

同樣身為一個2歲妹妹嘅媽媽，回想呢件事時，我覺得好心寒，咁細個小朋友真係一秒都唔可以離開視線範圍。我唔係歧視屋苑媽媽，但就算屋苑內都唔代表安全，意外邊度都可以發生，自己小朋友應該自己保護好

另外，究竟幾位妹妹嘅照顧者當時做緊乜？我真係好想問下當日始終不見蹤影嘅三位照顧者，你哋點教育到咁細個就識得欺凌其他人？

讀者投稿@心寒