![](https://i0.wp.com/backup.parentlicenses.hk/wp-content/uploads/2022/07/1870.png?resize=740%2C740&ssl=1)
#ParentLicenses1870
睇完上一篇中三妹妹唔識say no,我認為其實係基於父母太過保護自己個仔女,導致佢哋成為溫室小花導致,所以當面對室外嘅一切人間險惡,就顯得有啲不知所措
話說我姪女都升中四,今年16歲(題外話,我同我姪女其實只相差10歲),而我同我姪女非同住,一年帶佢出玩幾次同埋跟佢少少學校嘢
第一件事
我姪女好多嘢都唔敢問唔敢講,例如我帶佢去大快活食嘢,我諗住天候咁熱,遂叫姪女:「你坐住先,同叫嘢食先,我要行去圖書館還本書」
大快活路程到圖書館來回10幾分鐘左右,我諗住佢入咗去坐,涼住冷氣等嘢食啦,點知行到返去大快活見佢企咗喺門口玩手機
我呆咗,因為我睇到入面係有幾個位,就問佢:「做咩唔入去?」
姪女:「我驚啊,我唔敢叫嘢食」
我😑,姪女重話平時父母會叫定嘢食等佢
其實就算唔敢叫嘢食都可以入去坐住涼住冷氣先啫,到底係要幾保護個小朋友先令佢16歲都唔敢入餐廳叫嘢食?
第二件事
呢年事重令我覺得我哥真係太保護呀囡。姪女一直都有補開習,都係我哥叫我幫佢搵嘅補習,咁佢一直都係用zoom上補習堂,一星期都只係一次
之前個補習哥哥係會好主動咁約下一堂幾時上嘅,所以基本上佢哋補習嘅事我冇理過,但自上一位哥哥要開始工作所以冇時間再幫我姪女補習,故我要幫佢搵過個新導師。咁大家上咗第一堂之後我姪女ok,個新哥哥又有耐性教佢,我之後都冇理到佢哋
直至一個禮拜前,我姪女whatsapp同我講,話個哥哥上完第一堂後兩個禮拜都冇搵過佢補習,話係同我講聲
其實你哋有對方聯絡電話,直接whatsapp哥哥問下堂幾時補好難咩?我真係唔明,只係用whatsapp問一句下堂幾時再補點解咁驚呀?你呀爸有俾錢㗎🤣🤣🤣
不過我姪女係唔可以俾人話,記得上年教佢英文,只係講咗一句「呢啲中學唔可以再錯,你要背熟啲」,姪女就喊到收唔到聲,所以我都唔敢再話佢咩
此外,我姪女平時都好多甩漏,有時上堂唔記得帶書,唔記得做功課,有時帶佢出街唔記得帶八達通等等。呢啲雖然係小事,但多發生就變壞事,而當每次我同佢講「下次要記得」嘅時侯,佢都會話「平時爸爸會提我㗎」,然後又喊,真心次次都喊……
其實我真係好擔心我姪女,因為過多兩年考完DSE就叫出嚟社會了,而家入大學渠道好簡單,我唔擔心佢讀唔到大學,我只係擔心佢讀大學都重咁受保護,將來係會好蝕底。然而,我哥始終係長輩,姪女亦唔鍾意俾人話,我真係唔知講咩好……
讀者投稿@太過寵愛