#ParentLicenses1393

我係一個有小朋友嘅狗主

就算我細個屋企冇養小動物，媽媽都會教我街上見到狗千祈唔好跑；輪到而家自己有小朋友，我都會教佢唔可以亂摸陌生狗狗，喺狗仔附近唔可以忽然跑等等

逢星期日，我哋一家人都會帶埋隻狗去狗公園玩（有閘嗰隻，所以會放繩）。因為狗公園好大，又有草地，所以經常都會有家長就算冇養狗都會帶埋小朋友去玩

有個5, 6歲嘅小朋友不斷向我隻狗大叫，想引佢注意。我已經話：「小朋友，唔好向狗狗咁近距離大叫，狗狗耳仔好敏感，佢會覺得好刺耳」

個小朋友爸爸就好hea咁同個小朋友講：「唔好搞隻狗喇」

之後隔咗一陣，個小朋友拎住樹枝向我隻狗咆哮（係真咆哮，roarrrrrr嗰隻)，我隻狗狗即刻望住佢，個小朋友一驚起上嚟就尖叫同開始狂跑

我隻狗自然反應就係追住個小朋友，我即刻跑上前想捉住我隻狗，但個小朋友就自己仆親之後大喊，整個過程中我隻狗掂都冇掂到佢

個小朋友老母就即刻衝過去睇個小朋友，仲目怒兇光咁望住我話：「點解你隻狗咁惡都唔扯住佢？」

我唔知點解我個本能反應竟然係道歉😅

但「幸好」我老公就好嬲咁回擊話：「你帶小朋友嚟狗公園就應該教小朋友同狗仔相處嘅基本常識！」

個女人同我老公嘈咗一陣，我擔心個女人會搞大件事，若果個女人報警，佢哋實會係咪都拉我隻狗坐咗狗監先，所以我拿拿臨拖埋隻狗即刻走

我自問我隻狗都係有上過堂，佢正常情況下同人、同狗都相處得好好，同埋喺狗公園俾佢放繩玩吓都好合理啫？！

如果你小朋友係驚狗或者唔識同狗相處，香港大部份嘅公園都係唔容許狗隻進入，換言之你哋大把選擇，點解仲要帶佢去狗公園之後反而要我綁住隻狗？！

讀者投稿@我隻狗都有呀媽生㗎