#ParentLicenses1801

我出身於父母感情好差而又基層的家庭，每年買新書嘅錢都冇，次次拖到要十月，期間冇書用就成日被老師罰。我只係話呀媽未有時間去買，老師點會想像到係冇錢買書？

後來仲生咗細妹，小學因為派位入咗名校，啲同學大多數來自中產家庭。就算喺三十年前都一樣，有好多都係要俾錢先可以參加嘅課外活動，其中包括童軍，套制服好貴，我屋企連百幾蚊一套嘅校服都儘量三年先換一次，我點敢叫佢哋買額外嘅嘢

人窮容易志短，我知道好多人都係窮出身，靠自己努力讀書改變命運。但係如果係有學習障礙的學生，冇人會明白，花幾多努力都會失敗，年年都係留班邊緣爭扎，老師同埋同學又唔明點解你唔再努力啲

諗住做人平凡咁過都冇問題，總之有張大學畢業證書，應該會搵到份工啩，冇人話一定要發達。以前屋企重男輕女，成日灌輸女仔唔使讀咁多書之類，單純無知嘅自己信以為真。平凡嘅外表加上不上進嘅性格，中學已經識到男朋友，後來愛情長跑，十幾年後就結婚。

要等咁耐先結婚，主要係我哋都好窮，我哋兩個都係基層文職，人工非常配合地一樣「基層」。頭幾年我連weekend同夜晚都做補習，賺埋都只係萬幾蚊。後來我哋搬咗出嚟一齊住，我仲要俾錢屋企，我已經慳到出汁，食啲貴過譚仔嘅嘢，另一半都會覺得好有壓力，未計我仲要還大學啲non mean loan

見到以前啲同學、同事個個都嫁得好好，另一半唔係專業人士就做大公司管理階層，或者屋企做家族生意、住大屋。生兩三個做stay at home mom，仲有姐姐s幫手，冇錯，通常有兩個姐姐加埋四大長老幫手。我哋雙方嘅父母都身體好差，唔止冇能力幫我哋手（就算生得出），其實佢哋長期病患都仲需要我哋照顧

其實我哋都好鍾意小朋友，不過因為太窮，所以真係鼓唔起勇氣生。身邊嘅長輩成日話天生天養，但係作為天生天養嘅產物，我覺得唔使樣樣俾最好嘅嘢小朋友，但係基本物質同時間都要必須。然後我好努力工作，賺多少少先試吓，不過招致身邊好多人冷言冷語，不停攻擊高齡想懷孕嘅女性

最令人失望嘅係，呢啲人大部份都係女性，佢哋用一種高你一等嘅口吻教訓你，然後不停話「高齡產婦好易生有問題嘅小朋友」。我明白有啲人把婚姻關係當係打份工，大家冇愛情，當個老公係老細，總之準時出足糧，佢另外請多幾個part time「伙記」幫手都冇問題。然後當老細會想炒自己，換啲又平又後生嘅「血」，佢哋就會攬住啲仔女做擋箭牌。其實啲仔女都知自己嘅「用途」 ，當中只係利益，唔係為咗愛

我只係想講，係人都知「有仔趁嫩生」，不過生喺香港唔係人人都咁好彩。如果你連每個月俾半個姐姐嘅錢都冇，又冇公屋住，係咪咁容易先？當然一定有人話「做咗先講啦」，但我只係想做一個負責任嘅人

我另一半都好大壓力，佢晨早選擇躺平，接受現實；而我係個想靠自己，唔想認命，唔想亦冇本事靠男人。故此，我選擇再努力工作，睇吓可唔可以成為改變命運嘅人

我想喺呢度鼓勵其他同路嘅女性，共勉之

讀者投稿@一個中年女人