#ParentLicenses1791

我係一個80後嘅家長，最近睇到幾篇關於自閉症小朋友嘅問題而有感而發

喺我嘅成長史中，所理解嘅自閉症係外表傻傻地，唔識講嘢，講都係單字或者簡單句子，成日發呆，或者失驚無神會尖叫，失控會撞牆等，相信好多人都對自閉症患者嘅印象都係咁

相對一啲好活躍，唔聽人講、唔受控制、駁嘴駁舌、古靈精怪、搞破壞嘅小朋友會歸類成曳，細時嘅我就係呢啲曳女

細時嘅我對住初生嘅細妹好有愛。例如，我記得媽咪陀住佢嗰陣好鐘意食辣嘢，媽咪成日話細妹大過一定好食得辣，所以好錫細妹嘅我，當佢唔肯食奶，驚佢餓死，於是喺佢嘅奶樽上搽辣椒油。或者你會問點解唔係辣椒醬而係辣椒油，因為我覺得辣椒醬有核，而辣椒油唔會令細妹哽親，結果亦都可想而知，就係我個8月15即時膨脹咗。類似以上大人及正常人理解唔到嘅事多不勝數

喺我成長期中，喺學校我係異類，無朋友又無老師鐘意，長期俾老師罰坐門口單人位。甚至小三時，即使我俾男同學拉開條裙鏈，我即時「打賞」男同學兩大巴，但都俾老師掉轉嚟講，指責係我搞事，要見家長，記小過同罰抄

屋企長期因為我嘅行為而煩惱及爭執，連隔離屋班左鄰右里小朋友都無人同我玩。直到中學情況好少少，因為相對我間中學嘅問題學生比較起，我已經算係好乖

童年陰影令我對所有關心我嘅人都會付出所有，但當受到一些批評或比較激動嘅勸喻，我就會接受唔到，覺得人哋係針對我，簡稱「偏激」

直到我有了家庭，我二仔兩歲左右確診係自閉症傾向患者，但因為我二仔完全同我認知嘅自閉症患者無一樣似，當時嘅我真係腦內一片空白，完全接受唔到。我用咗兩星期時間去聽醫生講，上網搵資料，終於明白到喺二十世紀嘅自閉症譜系患者係咩嚟。原來「過度活躍」都屬自閉症譜系其中一種，只係需要到6歲先可以真正斷定為確診，6歲前係行為治療嘅黃金時期，6歲之後就好大機會要用藥物控制，4歲先可以確診為自閉症患者

講返我二仔嘅行為先，初生累計瞓覺時間為6至8小時，唔喊仲識笑，望嘢隨心；3個月大都唔會追視線，對高音反感，長期好動但學嘢好快，所有動作睇1至3次就會學識；8個月大識爬就開始玩屎，每日屋企都會喺唔同位置發現屎嘅存在，包括櫃底沙發底等；二仔識行之後，就係工人姐姐嘅地獄式減肥開始，每次沖過嚟嘅力道等於俾車撞

直到而家將近5歲，開始講到中文完整長句子，只不過掉轉晒名詞、動詞，講完要做重組句子，同細時睇五呎三嘅估歌仔咁（你明啦）。另外，每次出街都係一場挑戰性嘅軍事任務，到而家佢仲未試過斷手斷腳、生命垂危，我已經好感恩，然而長期損手爛腳連老師都習慣。喺公園或者室內遊樂場時，我直頭想同佢斷絕關係，每一次去公園其實都有教佢要慢啲、唔好衝動、唔好撞到人，要守規矩、愛惜公物、愛護其他小朋友，但佢真係總是玩起上嚟就忘形

其實我已經好幸運，因為有一班好有愛心嘅老師去教導佢，學校校長、老師同職員對佢嘅包容都好大。雖然停課影響咗佢嘅治療進度，每一次見到佢有改善，其實我都好感動，當中嘅辛酸真係不能以筆墨形容

我想喺度同各位家長有個請求，如果你喺街、公園、室內遊樂場等見到一個橫衝直撞嘅小朋友影響到你或你小朋友時，可以細聲少少及用堅定嘅眼神望住佢，同佢講：「小朋友你冷靜啲，唔好咁做，其他人會受傷」

亦懇請你可以唔好用一個責罵口吻去怪罪佢嗎？可以唔好用一個「你唔識教嘅～」眼神嚟望住佢家長嗎？我明白每個父母都愛錫自己小朋友，但你永遠唔會知道一個陌生家長嘅責罵，係對自閉症小朋友構成嘅影響有幾大，甚至可以係將一個小朋友嘅內心摧毁

每次二仔整親人，我知其實佢好內疚，但即時佢係會無反應，因為佢好驚人哋大聲，亦需要時間去重組句子以解釋佢自己不當嘅行為。例如，玩遊戲車時夠鐘落車，其他家長行咗入車道抱起自己小朋友，佢覺得車道係只容許車行，錯嘅係家長而唔係佢，所以佢直接撞咗落嗰個家長隻腳度，因為佢要泊好架車喺起點位，而該家長企咗喺個起點位。希望你哋明白，自閉症小朋友嘅偏執係好難讓外人理解得到，我只可講佢唔係有心令其他人受傷及對不起

每當二仔俾其他人責罵完，佢就會喺返到屋企當晚或者瞓覺時就會喊，會做一啲傷害到自己嘅行為。而每一次我都要用好長時間（1小時起步）去安撫佢情緒，好多時我都唔想同身邊親友解釋太多，因為我都儲蓄咗太多負能量，講出嚟只會令自己徒增更加多負面情緒，而令影響更大。只因為由細到大所有嘅解釋都係會被歸類為掩飾，接著就再聽到一些說教、糾正及指責

請問各位家長，如果你因為你當刻嘅憤怒而大聲責罵，作為一個大人又是否需要檢討？如果真係受傷嘅，你當然有權利循法律途徑去追究，我明白亦接受所有追討行動

理解先會有愛，各位家長，你哋希望自己嘅小朋友喺愛嘅環境成長同時，亦請正其身去教育你嘅小朋友

多謝你哋花時間去睇我嘅長話，共勉之

讀者投稿@心很累媽媽