#ParentLicenses1774

有日搭西鐵，見到有個K2, K3左右嘅細路周圍走，周圍摸，又跳「鋼管舞」，行為已經好滋擾車卡內嘅乘客，更甚係當細路咳嘅時候，仲要係除開口罩咳

其中有個大約20零歲嘅小姐姐，見到咁嘅情況就同個小朋友講：「咳要戴返口罩，唔可以除咗口罩喎」

個細路就衝返去同阿媽講：「個姐姐鬧我呀」

阿媽即刻行過嚟同嗰個女仔講：「關你咩事呀！？梗係除口罩咳啦，啲口水喺晒口罩裏面，咪唔合衛生囉」

我見到咁樣都出咗句聲

我：「太太，你細路咳，除口罩唔係咁好囉，口罩就係用嚟擋住你啲細菌同口水㗎嘛，你咁樣成車都中晒招囉」

點知個阿媽竟戾橫折曲：「咁驚你咪唔好出街囉」

然後個女仔就話：「衛生係常識嚟㗎」

個阿媽繼續蠻橫無理：「你哋咁驚，你自己揸車、自己買車囉，你班死窮鬼係都要搭車，咁我有咩辦法呀」

然後有個阿叔都睇唔過眼：「呀太太，你冇衛生常識，而家係你個仔唔啱，你點教仔㗎呢？」

個頭講完，個仔又除低口罩向住人咳

成車啲人即刻望住佢啦，點知個阿媽又一句反駁我哋：「咩就係常識呀！？你哋識唔識呀！你哋咳啲口水喺晒口罩裏邊，你哋先核突呀」

我就話喇：「呀太太，口罩真係用嚟擋口水、飛沫㗎，係你冇常識囉」

個阿媽仍然不甘示弱：「你哋先冇常識呀！我個仔返學日日都會快測係陰性先出門口㗎，即係冇事啦！冇事你哋驚咩呀！」

個女仔就話：「太太，就算你唔係新冠病毒，你都有其他感冒啩？又打乞嚏，又咳呀！」

阿媽再反駁：「佢鼻敏感冇菌㗎！」

個阿叔就逐點擊破：「太太，鼻涕都出埋嚟，咳嘅時候又有痰聲，鼻敏感會有痰㗎咩？你話流鼻水打乞嚏就話啫，你咳喎，有痰喎，我做咗幾廿年人，未見過鼻敏感咁樣呀！你話個氣管敏感就差唔多」

卒之個阿媽即刻拉住個仔去咗下一卡度坐，全程向我哋呢邊望，而當然佢個細路仲不停喺度除口罩咳

唉，戥下一卡嘅人真係陰公，個仔咳同打乞嚏都係除口罩

我想問而家個口罩係用嚟做咩㗎？！

讀者投稿@一個無錢買車既人