#ParentLicenses1741

某星期日16:30，某商場入面，我只想嗱嗱聲食啲嘢，準備17:00去接仔放補習。眼見前面有間KFC，用咗30秒喺自助點餐機點完嘢食，只想快快脆脆食完走人

當我拎完嘢食，想是但搵個位坐低嘅時候，惡夢就開始

我面前有張四人枱，見到個爸爸同個仔坐一邊食嘢

👩🏻‍🦰：「請問你幾位？」
🦹‍♂️：「我兩個。但我唔搭枱！」

嗰下即刻黑人問號，以為自己去錯邊間酒店個lounge。企一企，諗一諗，啲粗口沖晒上個喉嚨度，但我忍住。見你同個仔一齊，我出聲斯文啲，唔好嚇親個小朋友

👩🏻‍🦰：「冇位呀！我都唔想搭枱！之後放低咗個餐盤」
🦹‍♂️竟然出手，推我個餐盤，仲整跌咗杯可樂同薯蓉，再補多句：「乜你個人咁野蠻嘅！都話唔搭枱囉！嗰度咪有位囉！你坐嗰度！！」

佢所謂「嗰度」，半個場都俾啲外傭姐姐坐住喺度gathering，而其他枱全部都係對角有人坐，我明我係可以坐，但果下真心嬲囉！

之後，🦹‍♂️再推我個餐盤，再強調叫我走！我完全覺得生命受威脅，大叫：「有冇人幫下我呀？救命呀！」

我係誇張咗，但我真係驚佢下一秒會一拳中過嚟😂😂😂😂

未幾，有個女職員👱🏻‍♀️過嚟，了解完件事，同🦹‍♂️講：「希望你明白，呢張係四人枱，可以四個人坐」
🦹‍♂️惡mode：「依家疫情嚴重！政府都唔希望我出嚟同人搭枱食嘢！」
👱🏻‍♀️：「但政府都已經放寬咗四人一枱！」

真係要俾10個like👱🏻‍♀️👍👍👍👍👍，說出個重點

🦹‍♂️：「我唔理，總之我唔搭枱！」
👱🏻‍♀️：「咁不如我幫你搵過張二人枱！」

好快，👱🏻‍♀️幫🦹‍♂️搵到張「二人枱」，都只不過係四人枱中間多塊隔板

我認我咀賤，但真係忍唔住，你說話唔收斂，我亦唔使俾面你

👩🏻‍🦰：「咁撚驚就買外賣返屋企食，收埋自己唔好出街啦！你食KFC咋！尊重下場合！」
🦹‍♂️：「我鍾意出街食嘢係我嘅事，總之我就唔鍾意搭枱！」

我唔係睇唔起KFC，但我真係覺得喺適當嘅地方應該有適當嘅態度。你估我好想全場望住我咩？真係貪好睇！？

最後用咗7分鐘食完個餐，接仔放學！

讀者投稿@A