#ParentLicenses1696

最近阿媽同我講：「爸爸喺鄉下潮州起咗棟樓，一樓鋪面，二樓一千尺俾你，其他俾我哋養老同細佬」

佢唔係好有錢，六十幾歲仲做水電工糊口，估唔到仲儲到錢起樓。但講真，真係唔要，同埋一啲啲感動都冇

我細個時好想學畫畫，老師亦話我好有天賦，但佢唔捨得，唔想俾我學任何嘢，除非係免費

我一直著表姐妹嘅舊衫長大，過年時阿媽同佢攞錢買衫俾我，佢話：「呢個可以俾我食一餐好嘅，衫冇穿冇爛咪得」

等我大個少少，佢就開始洗我腦，邊個堂姐好乖，人工全部俾屋企人；邊個表姐好叻，嫁咗有錢佬，一家人享福

後來媽媽病咗，佢出軌，父母開始傾離婚，我喺房聽到。佢話：「大毛而家可以唔讀書，佢可以養你。你要人服侍嘅，咪唔俾出去做嘢囉，你哋可以出去申請綜援，可以返外家住，可以投靠你兄弟」

嗰下，我對佢真係死咗心。父女一場，我想不到佢真係可以將咁重嘅負擔推俾一個十幾歲嘅少女

我哋離開嗰個屋企，就住喺阿婆屋企，寄人籬下幾年，直到我哋申請到公屋，我努力賺錢醫好媽媽嘅病

已經很久沒有同佢聯絡，後來得知佢做水電嗰陣時由高處墮下受傷，佢住院期間想要我媽照顧佢。可笑的是，我媽居然想去。我憤怒到話：「如果你返去嗰個屋企，我就一刀兩斷！」

最後由我細佬去照顧佢

係呀，這個世界邊有咁好的事呢？因為一句「我錯了」「我浪子回頭」，全世界都要原諒你？因為「我老了」，我就應該心軟，就應該放下一切？

講完俾我知鄉下起咗屋後，又過了幾日，我一家三口染疫，仔仔病情比較嚴重，不過已經好返

好返之後，我先同我細佬講。講完唔夠一陣，佢突然打電話來話好擔心我哋，佢驚到喊，不如將個仔俾佢帶返潮州，佢同我媽返鄉下湊孫

佢：「求下你體諒一個潮州老人嘅心，這個歲數，得啊B一個男孫」

（細佬話咗佢唔會結婚生仔）

我真係得啖笑：「你咁後生，男人七十都可以生仔，再生咪係囉」

細個我不在意屋企窮，但我希望爸爸係愛我嘅。爸爸你俾唔俾我去學畫，俾唔俾我去讀書，我都冇所謂，我可以明白理解你有苦衷。

遲來的親情比泥賤，我怨恨咗咁多年為什麼會有人不愛自己嘅女，早已過了那個「需要」的年紀，直到我真的不需要了，我放低了

所謂父母子女緣深情淺，已經無所謂了，我可以理解有些父母只會只愛自己。只不過冇想到幾十年後嘅我依然只是一個工具，如果我生嘅係女的話，係咪就冇呢個假裝的關心？

不被父母愛的子女，放過自己吧！我們自己愛自己，愛自己的兒女就足夠，其他不重要的人就放下啦，即使我再恨佢、再怨毒佢，到頭來，痛苦的也只有自己

讀者投稿@大毛