#ParentLicenses1687

有日BB突然發高燒，隨即打電話問附近私家診所，佢哋話一律唔接發燒症狀嘅病人，我哋只好去最近嘅私家醫院睇，一睇就睇咗6個鐘

等候期間，見到有好多貼住退熱貼嘅小朋友嚟睇醫生，有啲一個小朋友有3, 4個大人陪（父母同長老級），有啲就一個工人抱住小朋友加兩個大人跟住

其實一個小朋友去醫院睇症，到底要幾多個大人陪同先為之合理呢？人人睇法可能唔同，作為父母當然好緊張仔女，我明！但係而家疫情嚴重到咁，無咩必要都唔去醫院，無咩事都留在家啦，係咪？！

一家人連埋工人咁嚟晒，為嘅只係陪一個小朋友睇症？實在太誇張！人人都咁做的話，染病嘅風險增加，間接加重前線醫護人員嘅工作！

我哋等睇醫生咁耐，醫生同護士係急步/小跑步咁樣跑去做嘢，絕無停手！喺咁凍嘅天氣，幫我哋登記個護士都做到滴晒汗！佢哋都好心急幫大家睇病，無奈係真係忙到飛起，但都竟然有個呀媽話等得耐，仲去拉住個姑娘嚟鬧

其實醫生同護士都有媽媽，佢哋都係媽媽嘅心肝寶貝！非常時期，請大家俾啲耐心等候，體諒醫護人員嘅辛勞！無咩事唔好四周圍走，留家抗疫

最後，真係好感激所有前線嘅醫護！希望大家身體健康！希望政府俾多啲資源佢哋！支持佢哋！咪再派幾粒燒賣就當體諒好嗎？
🙏🏻🙏🏻🙏🏻

圖片來源：JobMarket
讀者投稿@留家抗疫媽