#ParentLicenses1675

我公司同事（下稱A）本身個人都係幾正常，後來佢個女兩年前喺疫情下出世，所以佢變得特別緊張

呢兩年來，佢會好關注我哋同事嘅個人衛生，例如有無戴好口罩，有無聚會，有無定時洗手等等……佢話因為個女仲細點點點，所以希望我哋盡量就佢同配合佢

明白嘅，咁做好個人衛生同時都係保護自己，所以一路都ok。A亦會成日喺Facebook鬧啲人唔戴口罩呀，去船P呀，生日會等等……屬一名典型防疫戰士

兩年過去，佢個女都兩歲，見到佢Facebook開始會多咗帶個女出街，但奇怪嘅係，好多時佢post嘅相片當中，佢個女都無戴口罩，防疫帽都無。諗住佢因為影相先除口罩，但再留意佢同老公都有戴住口罩影相㗎喎，所以覺得有少少奇怪

最近第五波爆發，又將近新年，A又開始做防疫宣傳，叫我哋唔好去拜年，唔好跨家庭聚會，因為如果我哋有咩事會攬炒埋「佢女」

題外話，佢成日都會skip咗個量詞。「我女」「我女」「你仔」「你仔」，永遠無咗個量詞「我個女」「你個仔」，連打字都係咁。Sorry，我個人覺得好銀耳所以呻下

返正題，年初一，佢喺公司group發嘅第一個message唔係拜年，而係問大家有無去團拜……係無頭無尾就咁一句「大家有無團拜」，結果係無人應佢，但大家有send下啲貼圖講新年快樂

同晚，我發現A喺Facebook post咗佢初一嘅「團拜」相，喺嗰張相數過有26人。我即時閃出一句：「你叫人唔好跨家庭聚會，你自己又跨家庭聚會？」

到咗今日初七返工，佢一返嚟就衝咗去同事B度笑笑口話：「我見你新年好多節目喎，仲要個個無戴口罩，咪叫咗你哋唔好聚會囉，一陣惹到我，我就會惹到我女，咁就煩啦」

屌！新年流流我都唔想講粗口，我忍唔住又笑笑口彈咗佢一句：「下！你話B？你初一都26人啦」

A：「我個啲全部係親戚呀，呀B係同friend囉」

B：「下！Omicron變種識分親戚同朋友㗎？」

A：「唔係，不過我好sure我所有親戚都好保護自己，佢哋唔出街」

我：「都唔會零出街囉……」

A：「總之B唔係咁好啦，咁多人又唔戴口罩」

B：「⋯⋯下」

我：「咁你26人都無戴口罩呀，咁又好好？你自己有個女出街夠膽除咗佢口罩影相，你而家話人聚會又唔戴口罩，你都幾double standard㗎喎」

A：「我無，我不嬲無幫『我女』戴口罩，佢得兩歲咋。『我女』咁細，佢唔會知口罩用途，佢只知唔鍾意有嘢罩住佢，所以我先咁緊張你哋唔好惹到我」

之後嘅對話已經唔再重要，因為呢個老母係CLS，我同B以後返工都唔會再就住

讀者投稿@屌你幫個女戴番個口罩先再講啦