![](https://i0.wp.com/backup.parentlicenses.hk/wp-content/uploads/2022/01/img_2767.jpg?resize=740%2C309&ssl=1)
#ParentLicenses1658
同老婆一齊咗7年,大家都係28歲。佢係我中學同學,但我哋喺中學畢業之後先一齊
老婆喺中學時期都幾mk,好唔認真讀書,中學畢業之後做過文員同商場接待,人工大約萬頭;相反我比較鍾意讀書,大學之後喺醫院返工,人工大約五、六萬左右,至於點解要講及人工,係因為關生育問題事,並非我睇佢唔起
我由細到大都好憎小朋友,憎嘅程度用以下例子令大家理解,例如當中學有活動日,可以選擇去幼稚園做義工或者去搬運公司做工作體驗,全班只會得我一個主動揀去做搬運
我覺得要花心機、時間同耐性湊小朋友好辛苦。雖然而家有時候返工都會接觸到小朋友,但都唔係會見好耐,同埋我都會盡我責任照顧佢哋
關於以上呢啲嘢,老婆同我拍拖之前已經知,我都有問過佢意見,有講過我好唔鍾意小朋友,佢一直都係答我:「係呀,養狗仲好啦」
老婆對乳膠敏感,所以我哋發生關係都係靠佢食藥避孕,我都有定期陪佢去睇醫生同每日提佢食藥咁
直到上年年頭,老婆同我講話醫生叫佢可以唔使再去,因為每次都係俾同款藥,而且又無咩副作用
聽完我都信佢,因為真係無計劃過要小朋友,亦唔想佢食藥咁辛苦,我自己都計劃今年年中做絕育手術
直到上年11月中,佢同我講佢月經無來,我就同佢去驗,結果真係中咗。咁都無話100%成功避孕嘅,我咪以為係嗰0.00000001
老婆話唔想落,唔想殺咗一條人命,我明白嘅。我收拾心情,幾唔想都要扮演一個好爸爸嘅角色
事情發展到上星期,我用電腦,見到老婆連咗 WhatsApp Web,無意中見到有個 group message通知:「恭喜xx偷精造人大計成功」
我緊係撳入去睇,原來老婆由上年開始已經無食藥,有小朋友唔係意外,係佢「悉心」安排
嗰晚我同佢攤牌,佢同我講佢只係想要個完整嘅家庭,話我人工收入絕對可以養到小朋友。佢話佢唔早講,係因為講咗後我一定會反對,最後只會離婚。但佢無諗過佢咁做,我都會好反感,其實都會同佢離婚
我完全唔想要個小朋友,一係就仲有得落就落,一係睇到時判贍養費判幾多,我就俾返佢
佢反問我:「點解可以咁冷血?個小朋友係無辜!」
但佢有無諗過我都係無辜呢?可能有人會屌我:「愛就識做,有咗就唔負責任!」
如果佢真係有食藥而又中咗,我緊係會負責任,但我而家完全係被蒙在鼓裏
再理性講,佢份人工根本養唔起一個小朋友,香港環境更加唔適合生仔
佢話一開始計我每個月俾二萬佢就得,到時候我份工可以專業移民帶埋佢哋
聽到我真係笑出聲,原來佢嘅計劃係自己無能力做到又無問準其他人嘅
自己想要所謂「完整」嘅家庭,就生個小朋友喺香港捱。大佬!我唔使照顧兩老?可以話走就走嘅話,我一早走咗啦!
我明要個小朋友一出世就單親好慘,但其實我真係好唔鍾意小朋友,我都好慘。或者大家會屌我自私,但我都係比人呃。真係最多一個月見一日令個小朋友好過啲
點解人可以咁恐怖,7年都唔知同咗個咩人一齊。大家有無咩建議可以處理到個小朋友?
圖片來源@功夫
讀者投稿@勉強無幸福