#ParentLicenses1648

話說，我喺間都幾細嘅food court等位，等咗10分鐘後，我終於見到有個坐喺4人位嘅婆婆就食完

我就上前去問咗聲：「可唔可以坐低？」

婆婆望一望我話：「可以」

咁我就坐咗喺婆婆對面，然而坐低後，我見到有位女士喺婆婆後面，佢好快行開咗，我都無多諗

過咗一陣，婆婆未走，位女士就帶住佢老公同仔仔（約5-7歲）返嚟，佢哋就企喺度。然後婆婆要走啦，咁我就同婆婆講咗聲：「唔該」

下一秒，嗰位爸爸就放低晒佢哋自己啲嘢食，再有幾袋嘢放喺我對面，重點係無問過我，然後莫名其妙咁睥住我話：「我哋3個人」

我嗰刻真係心諗：「jm9（編：做乜鳩）」

嗰位爸爸繼續睥住我話：「我哋嚟先」

喺嗰刻先load 到，可能係原本嗰位婆婆身後嘅女士比我早嚟等緊位，但佢無問過婆婆，亦都冇喺我坐低嗰陣時阻止我，反而係佢決定「班馬」，等婆婆真係走嗰陣，再成班人坐低逼走我

嗰位老豆全程凶神惡煞睥住我，仲要係超級冇禮貌咁放低晒自己所有嘢喺我面前，咁樣逼我走？大佬呀，真心丫，可以喺小朋友前面俾啲禮貌嗎？

其實你哋可以好聲好氣同我解釋返，我都唔係有心，就算你唔知我無心，點解做人父母連咁普通講下道理都做唔到？

我都忍唔住講咗句：「我唔會同小朋友爭位坐，但係你哋冇開口問過」

最後我當然係俾返個位佢哋，但係，嗰位老豆由頭到尾都睥鳩住我，連我行出咗food court 都仲口噏噏咁

救命！俾啲禮貌好無呀，人哋老豆？人哋呀媽？下次自己出下聲可以嗎？

讀者投稿@jm9