#ParentLicenses1626

25號嗰日同老公去咗尖沙嘴某酒店度食自助餐，食完都成9點幾，就諗住去海旁影下燈飾。點知影影下落雨，咁我哋都即刻走咗

喺九龍香格里拉嗰邊上咗天橋，諗住行去紅磡嗰邊搭車。由於我哋都推住BB，所以就選擇喺元氣嗰邊搭𨋢

上咗天橋之後，其實都已經有好多人一齊行緊去紅磡站。行到半路，突然有一個踩住兩個轆嘅滑板車嘅男仔無啦啦喺我哋架BB車前面打斜咁攝埋嚟，我同我老公都嚇咗嚇，然後即刻剎停咗架BB車，先至無造成意外發生

個男仔理都無理，繼續喺條咁多人嘅天橋上面繼續踩佢塊板

當刻我都即刻搵緊個男仔嘅父母，諗住叫佢理下個仔，但我望嚟望去，都唔見佢父母咁，所以放棄咗，遂諗住上前叫個小朋友：「唔好喺條咁多人嘅天橋上面踩板，廢事有咩意外大家都唔開心」

正當我諗住上前嘅時候，我隔離無啦啦攝多咗架三個轆嘅滑板車出嚟，上面有個目測3, 4歲嘅男仔，估計同踩兩個轆嗰個應該係兄弟嚟。佢就追住喺佢哥哥後面，咁哥哥可能想等埋細佬就踩慢咗

喺哥哥等細佬就到嗰陣，其實我哋都就嚟行到佢隔離（已經特登避咗佢）。點知個哥哥又再開始踩板，又諗住攝喺我部BB車前面，佢仲喺我哋BB車個轆隔離諗住俾力踩

我老公又再一次剎停架車，然後我哋都即刻大聲喝停佢同埋話佢，因為已經係第二次！

同時，佢對失咗蹤嘅父母先至現身睇咩事，個哥哥仲依然諗住繼續踩，個爸爸好大聲咁講話：「你仲想上前同人哋平排，人哋就嚟鬧你㗎啦」

佢個語氣就好似俾緊說話我哋聽咁，然後成個過程就好似睥住我哋咁，我心諗：「大佬你竟然唔係道咗歉先？佢都唔係第一次差少少撞到我架BB車，而係第二次啦喎，鬧佢都好應該啊，係咪啊？」

「同埋條橋咁多人，就好心唔好俾你個細路喺度踩板啦，撞親邊個都唔好啦下話？！萬一我哋剎唔切架BB車，撞親你個仔，咁我哋道唔道歉好啊？」

圖片來源@頭文字D
讀者投稿@好心啲大人就睇住啲細路啦