#ParentLicenses1595

這是一篇好長好長的文，你當我發泄咁寫啦，可登可唔登或者分幾次都得

我們家共有五姐弟，你沒猜錯，我細佬是最細的，媽媽生了四個女兒才得到一個寶貝仔

以前從不覺得家裏重男輕女，只覺得媽媽總是說弟弟是男仔，他不用做家務。再後來，父母離婚，我同前三個妹跟我媽；小的一雙弟妹跟爸爸

為了生計，我沒有辦法之下，唯有中三輟學，然後就出來養家糊口。然而阿媽有病，佢做唔到嘢，唔知點解明明很有需要，但卻唔肯申請綜援

後來，我賺咗少少錢，買咗間有三房單位的村屋。同時間，我細佬就話爸爸對佢唔好，佢要來投靠我哋，我都俾佢自己一間房，條件我要求佢去讀書

細佬：「我已經十八歲，你管唔到我」

我：「咁你出去返工啦」

細佬：「我有社恐症」

我：「咁你就去睇心理醫生啦，最多我俾錢囉」

最後佢又唔肯去，日日在家中打機

因為我係做檔口，阿媽幫手收錢咁樣，但中午我老母仲要返去煮飯俾佢食，驚佢餓壞個胃。因為前幾日朝早做好放飯廳的食物，竟然到夜晚我哋收檔返來都依然喺度，原來佢只係食薯片、餅乾度日，老母就差啲要餵埋佢食咁

我：「不如你來檔口幫手啦」

細佬被逼無奈來到檔口，成個黑面神咁得罪所有客——一係就喺度鬧阿媽人頭豬腦找錯錢，一係個客可能有些麻煩就話人哋運吉，所以我都忍無可忍，要求佢離開我檔口，直情要佢離開我屋企

好戲上場

我要求佢：「即刻收拾行李同我扯」

細佬：「咁我住去邊」

我：「我唔理你去邊，總之唔讀書又唔做嘢，想當米蟲我就容忍唔到」

我哋住四樓有露台，細佬即刻爬到露台圍欄度坐喺度

細佬：「你要趕我走，我無處可去，唯有去死」

我老母即刻嚇到跪喺度，求佢唔好咁，話：「你死，阿媽不會獨活」

頂，上演母子情深。我啱準備話「要死就好快啲」之際，我老母即刻要我細妹拖我落街食下午茶冷靜下

之後返來，佢哋已經冷靜返，老母就話我知：「間屋係你嘅，你要趕佢走都無可厚非，但佢係我個仔，我要同佢同生共死，他要做流浪漢，我就同佢一起睡天橋罷」

我舅父又過來當說客：「你咪當你阿媽養隻貓養囉，睇喺阿媽的份上，你給他一次機會啦」

我同佢哋講：「你這次要自殺縱容佢，下次呢？開咗個頭，無得返轉頭，佢而家性情未定，仲有得救，而家要佢自力更生容易，咁十年後呢？阿媽死咗呢？」

費盡唇舌，但佢哋都無人肯聽我，對於佢哋來講，仔在身邊是唯一重要的

於是，呀「米蟲」就咁喺屋企度過咗十年，咩都唔做。只要我在現場就乖，會做家務；如果我唔喺香港出去做生意，就日日聽到阿妹打電話來投訴：「細佬又鬧老母啦」

因為鬧細佬係「米蟲」「吸血鬼」，細佬就打佢

細佬已經28啦，頂！

後來細佬突然有一排好生性，主動做家務，又口乖話想做UBER司機，但要我買部車俾佢，要我俾十萬，我當然NO啦！

佢竟敢即刻搵老豆阿媽舅父過來，指責我睇唔起佢、要跳樓、要自殺、要講遺言。我嗰個老母又即刻跪喺度話：「你俾佢啦，我幫你打工還返俾你」

我話：「你的積蓄呢？做咩要用我的錢？」

原來咁多年我俾的錢已經全部給佢個仔揮霍一空，甚至連睇醫生的錢都已經無

頭暈之下，老母跪喺度苦苦哭求，我老豆直接話：「你的錢就係屋企的錢，拎出來俾細佬買車理所當然」

我要佢即刻同我扯，我唔係梅艷芳，我無咁偉大呀頂

最後都係唔忍心個老母不停哭求，我細個係舅父們湊大，又要俾舅父們面。細佬寫咗借條，我俾咗都知要唔返，後來我得知原來係佢老友都係咁同屋企人攞錢買車，所以佢就有樣學樣

經過此事，我已經心淡，我供阿妹們出國留學，因為佢哋一早已知一家都係吸血鬼，所以就話想去加拿大讀書，現在留喺加國無再返來，而我自己都去咗英國陪屋企人，細妹就心痛老母無人照顧所以唔肯離去

上一星期，老母突然暈低送去醫院，驗身得出可能係患上癌症，但至今未有準確報告

細妹打電話來話細佬唔肯去探阿媽，阿媽又掛住個仔，成日都又驚又喊

我喺細佬FB見到佢又出去飲酒，又同囡遊車河，嬲到我即刻打電話去同佢講：「間屋係我名，老母幾長命你住幾耐，老母一歸天你即刻就掃地出門賣咗間屋，你自己諗下」

鬧完佢先去探阿媽，但佢去到都係鬧老母搞事

我今日喊住同我老母講：「我今年40，阿妹們全部出身先敢結婚生仔，阿仔先一歲，早年勞累過度而家周身病痛。我自己無讀到咩書，阿妹由細到大我管教到大，點解這三個女仔可以自己獨立，個個都有好前程，你個仔有今時今日都係你造成。縱子如殺子，你縱到佢咁，你又唔係有身家可以令佢過世」

阿媽：「我以為你不會結婚啦，以後這一切都係你細佬嘅」

我：「所以佢咪唔做嘢囉，所以佢等緊我死好俾遺產佢？你有無想過如果唔係你一路縱容，佢而家可能同阿妹一樣係醫生？係老細？係高層？」

希望全天下的父母可以好好管教自己的子女，愛佢唔係藉口，唔係唔捨得佢哭鬧，唔係佢想點就點，再美其名為愛。係應該為佢計謀，他三歲你可滿足佢，那三十歲呢？如果你沒有富有到可以食幾世，咁就要思考下你的「愛」是愛還是謀殺

我沒有讀到書，我都無父母管教，細個係阿婆湊住，又輪流住舅父們屋企食百家飯大

我不知如何管教子女，我只知我三個妹妹好乖，佢哋好知道家姐辛苦搵錢供佢哋讀書，養佢哋大，佢哋好上進，留學期間有空餘時間都會去打工，靠自己賺生活費，咁樣家姐就唔使咁辛苦。我對她們唯一的信條就係：無人能讓你依靠一世，只能靠自己

我不知我這樣管教是對是錯，但我已經盡力

讀者投稿@大家姐