#ParentLicenses1568

雖然內文可能跟生仔考牌不完全相符，但作為母親，我真係好想話俾更多人知，希望版主能夠酌情睇睇能否照出帖

話說早兩日，因為老公係某動畫的擁躉，所以我和兩歲幾嘅囝囝陪佢去咗馬鞍山某商場睇嗰套動畫嘅展覽

其實展覽係打咭為主，場內仍劃分一個好細範圍設置一條小型瀡滑梯，可以排隊入內玩

輪到我哋時，負責安排該活動的姨姨問我們：「介唔介意等多兩分鐘？」

我哋：「都係兩分鐘啫，無所謂啦」

兩分鐘後，上一輪嘅小朋友玩完，囝囝就好開心咁入去瀡啊瀡

我好奇係咪有人數上限，就同嗰位姨姨傾咗兩句

原來，頭先嘅人數係未滿嘅，只不過因為佢見我囝囝未行得穩，怕比較大嘅小朋友會撞到佢，所以就咁樣問我哋

我同老公知道咗之後，都覺得姨姨好體貼

該姨姨嘅工作就係負責計時同計人數，就算講到兒童安全亦只係監護人責任。甚至有其他家長質疑佢「點解响未達人數上限前就要佢哋等」「點解唔係叫在場班大嘅小朋友唔好再玩」（我同老公未有小朋友時喺其他商場見過類似情況），呢位姨姨都無本着多做多錯嘅心態，我真係好想搵多啲途經去表達多謝佢

我記得囝囝仲要坐BB車時，當日我喺一個超大型、走高級路線嘅商場，我推住BB車落咗去樓下嘅超市，想上返去嘅時候已經鎖咗客𨋢（當時晚上7:45左右），剩返扶手電梯

職員話某啲原因，商場要求提早八點閂門。我唯有怪自己無為意，但地鐵站喺上層，離開商場嘅門又閂晒，咁我就詢問職員：「有無貨𨋢可以搭？」

職員話：「BB唔係貨，你自己諗辦法」

好彩有位保安最後幫我拎架BB車上去，我就抱住BB，如果唔係，我都真係唔知可以點諗辦法……

未有小朋友前，覺得香港係高尚嘅文化之都；有咗小朋友之後，發覺香港人比想像中好心、熱情

圖片來源@F.M.
讀者投稿@F.M.