#ParentLicenses2826

是咁的，我同朋友帶埋19個月大BB去playhouse玩，遇上河東獅吼！

話說嗰陣BB想玩個起重機設施（紫圈圖），咁啱個位又冇人，我就立即抱佢上去玩啦

於坐穩一刻，突然間有個年約五六歲嘅姐仔直接一屁股坐埋落嚟，發揮佢嘅臀大肌力量向後推開19個月大嘅BB

喺呢種情況下，我緊係要叫停佢啦。當時人多嘈雜，費事佢聽唔到，焗住都要大聲少少同佢講：「BB玩先㗎！」

BB玩完落地之後，嘩！突然有個山東婆般氣勢如虹嘅師奶走埋嚟，目露凶光，眼珠幾乎都就嚟跌出嚟，用響咹咁大嘅聲線，於眾大人小孩嘅場合咆哮：「你啱先係咪罵我個女！？我係佢阿媽都未試過大聲話個女，你憑咩對我個女大聲？你個女係女，我個女唔係女啊！」

呢個師奶為咗捍衛自己個五六歲千金真係乜都做得出，但從來冇考慮過檢討自己千金嘅行為（仲有前故：之前佢個千金玩起重機嗰陣撞到我朋友個頭，但個師奶都冇任何表示）

基於我秉持住「唔同戇鳩仔爭論」嘅理念，我梗係冇睬佢啦，同佢say咗sorry（因應要求我細聲返少少唔知佢聽唔聽到啦）就立即行開至少廿米距離，去第二個區玩

但係個師奶並未下火消燥，反而變成超級撒亞人氣場爆發

佢喺度做咩呢？就係密切追蹤我嘅去向、白花油style拎住iPhone瘋狂追住我捕捉樣貌、狗仔隊般匿埋一角全神貫注金睛火眼望住我一舉一動並且偷拍（連自己個女都唔望下）、多次主動走向我面前要求嗌交（同時佢份人又有少少含蓄，好驚人哋影到佢個驚世醫美臉，用手機擋住自己個臉又立即避開）

由於我一直以來都冇滿足佢對於嗌交嘅深切渴求，七竅生煙嘅師奶選擇向職員投訴

當然個師奶一連串嘅出位行為大家都已經看在眼內（包括職員）。職員了解事件後，反而係即刻offer我哋有多一次免費入場機會，等我哋可以避開隻痴線西下次再玩過

最後，個師奶見我哋走咗，隨即隔住塊玻璃都要以勝利者姿態鄙視眼光目送我哋離開，猶如表達緊「媽咪幫你搞走咗個衰人啦，有咩事媽咪會幫你搞掂」

事件告一段落，雖然唔知呢個囂張跋扈嘅師奶育兒方針究竟係點，真係只能慨嘆有咁嘅老母就會有咁嘅女，佢呢種身教真係令人嘆為觀止

相片來源@西貢魚毛
讀者投稿@西貢魚毛