#ParentLicenses2761

突然醒起有件關於排隊嘅事想分享下，想睇下大家諗法

早兩晚聖誕節，去咗南山邨買格仔餅食。舖頭分開兩條隊排，左邊條隊係只買格仔餅，而右邊條隊係買雞蛋仔或者兩樣都要

嗰晚一如既往好多人，因我只係想食格仔餅，所以排左邊條隊。等咗都幾耐，終於排到我，而隔離右邊條隊（兩樣都要），係排到一個女仔。女仔同佢老母一齊嚟，但佢老母就排喺我（格仔餅）條隊嘅後方，都幾後下

重點來了。個女仔話要一底雞蛋仔，老闆娘好快拎咗一底俾佢，收咗錢。當個女仔準備行開嘅時候，喺我條隊後方嘅老母就大嗌：「女，加多一底雞蛋仔！」

當時我都不以為意，老闆娘都好快手，即刻拎咗第二底雞蛋仔俾個女仔。當我以為完嗰陣，後方嘅老母又再次大嗌：「女！加多兩個格仔餅🧇！」

我當時心諗：「咁都得？」隨即擰轉頭望下個老母，佢同唔知邊度突然彈出嚟嘅兩個人有講有笑，當時我都冇諗太多

終於，老闆娘整好嗰兩底格仔餅🧇，俾咗個女仔。當我以為終於完嘅時候，隊伍後方又又又又傳來個老母把聲：「女！你同佢講，再要兩底格仔餅🧇！」

嗰刻我已經聽到少躁底，後來老闆娘整好埋嗰兩底格仔餅，又咗個女仔先，阿女就遞俾老母，而老母就俾咗兩底格仔餅俾突然彈出來嗰兩個人

想知大家會點睇呢種行為？個人覺得如果下下恃住條隊有自己識嘅人，就理所當然地叫人幫你買埋，一底唔夠，重要額外加多四底，咁排隊嘅意義究竟去咗邊呢？

相片來源@喜劇之王
讀者投稿@早晨你好