#ParentLicenses2728

有一日同小朋友去咗康文署下嘅深水埗北X街體育館嘅遊戲室。我哋兩點去到啱啱好話滿咗，要等下一場三點。小朋友話想玩，所以就陪佢等籌

到入場嘅時候，正當我諗住陪埋小朋友入場之際，點知職員攔住我，好激動咁話：「家長唔俾入！小朋友咁大個，自己玩得啦！」

我當刻有少少無奈，就問：「吓？我入場坐喺側邊睇住都唔得？」

職員：「唔得！啲細細個就話要大人睇住唧，咁大個嘅唔使睇啦！」

其實究竟點樣定義大個？明明使用條件講得好清楚：
一、未滿4歲者必須由家長陪同
二、每名兒童應只由一位家長陪同
三、主要供4至9歲並且身高不超過142厘米的兒童使用

呢個係由康文署規定，點解有白字黑字條文唔去跟，反而要跟你上司？「應有」就即係建議要有，即係冇話唔可以有

我覺得一日重合資格入遊戲室嘅小朋友都需要有監護人在場睇住，有啲家長放心唔入，就唔等於其他家長都係會放心小朋友自己入

無論係4歲定9歲都好，睇住小朋友安全都係大人嘅責任，唔睇就係大人都同樣要負嘅責任，而家竟然同我講個小朋友夠大個，大人唔准入場？職員的確係用「唔准」兩個字。其實佢口中嘅所謂「大個」，都之不過係二年級，可以話唔使睇，但都係有需要睇

玩過其他康文署遊戲室嘅條件係所有小朋友都要有大人陪同先可以派籌入，只係限一位，甚至比較緊張嘅地區只可以一大一小，都唔可以一大兩小，咁先公平同合理

我同另一位在場家長跟佢理論「乜嘢叫未滿4歲先要家長陪？」，職員就只係係咁指住「4歲」嗰個條件，我哋又指返「每名兒童」嗰個條件，佢唔夠講又叫我哋同佢上司講

喺場外就見到啲小朋友一玩得興起就推人、撞人、鬧人，結果真係有小朋友喊住走出嚟話被人撞親。人哋啲小朋友嘅行為我管唔到，但我想睇返住自己小朋友，點解反而係話唔得？

我都明個遊戲室唔係好大，但我當刻被截嘅心情既無奈又不解，其實職員唔俾入都可唔可以禮貌少少，例如講聲「因為場地空間所限，希望小朋友可以獨立，家長就喺出面等」咁？而唔係一副「咁大個人重要人睇呀？」嘅態度，我又唔係要擒埋上去一齊玩，我都只係想喺場內側邊啲櫈觀察住小朋友啫

另外，既然咁緊張場內空間，同埋限28個人頭，點解派籌時唔按一大一小人頭派？派晒俾小朋友先講大人唔入得？重要用你對眼嚟做標準？有啲小朋友真係生得大粒咁又點計？

好，就當你想放多啲小朋友入去玩都唔緊要！點解開場後先到嘅家庭問可唔可以入去玩，職員又可以放埋入去？咁啲規矩去咗邊呀？限28人去咗邊呀？乜唔係好逼只限28人咩？乜唔係好嚴謹嘅咩？我企足喺出面咁耐，個場內最少30+人，職員都係咁講已超過28人，係咁叫我有啲咩同你上頭講，咁即係想叫我同你上頭講你過咗28人都繼續放呀？咁啲所謂原則去咗邊呢？

我小朋友唔係玻璃做，唔係唔可以一個人入場玩，只係一個比較內向被人蝦都唔出聲嘅小朋友，而我覺得去一個佢未玩過嘅陌生地方，想睇住自己小朋友原來都會被唔好嘅態度去攔截。唔通我去其他區玩，人哋要求一大一小先俾入時，我又可以同人講我小朋友夠大，佢可以自己入去？

講到呢度，我都明白呢啲場所係政府下嘅免費場地，我冇得要求咁多，但對於安全問題，我始終覺得應該要有返原則同責任喺度。我冇發爛渣，我最後都唔想個職員難做，係有企喺出面隔住玻璃咁睇住

其實我咁諗係咪都要考牌？

讀者投稿@大個嘅定義