#ParentLicenses2146

對上個星期六，我帶咗小朋友去荃灣一個playhouse，當日係旅行社搞嘅包場，應該有100個小朋友

Playhouse個場都算大，所以唔算擠逼。玩咗半個鐘左右，我朋友同我講話佢兩個仔都分別俾同一個男仔打，叫我小心啲穿著白色衫、黑白間條褲嘅男仔（下稱小惡霸）。由於我兩個小朋友都係女仔，所以我都好小心咁由頭跟到尾，亦好留意個小惡霸嘅動向

未幾，我哋玩玩下之察，突然聽到有個媽媽好大聲咁講咗句：「放手呀！」

我隨即就望下發生咩事，見到個媽媽一手拖住個仔喺自己背後，另一隻手就拎住架可以坐小朋友嘅車仔，而車仔另一邊就係小惡霸

單憑咁嘅畫面，以我理解就係兩個小朋友爭嘢玩，媽媽正在保護自己小朋友，反觀小惡霸嘅身旁就唔見有家長陪同。最後到職員過嚟調停，仍然係未見小惡霸嘅家長出現

又過咗一陣，我陪個女玩緊嗰時，見到個男仔跑過嚟我呢邊，我自然留意住佢。我見佢一行去某張枱，本身兩個小朋友喺度玩緊枱面嘅車車，小惡霸一行過嚟，而因為佢背住我，我睇唔到枱面發生咩事，但佢埋枱唔夠五秒就見佢一掌打落隔籬男仔個額頭，真係「啪」一聲嗰隻

被打嘅男仔係佢爸爸帶嚟，個爸爸好大聲咁喝咗一聲：「你做咩又打人呀？！」

由於爸爸把聲十分響亮，小惡霸呆一呆，低聲唔知講咗啲咩

個爸爸再講：「咁你都唔可以打人㗎！已經冇同你爭㗎啦！」講完呢句，時間好似停頓咗咁，個爸爸同小惡霸四目相投

再過咗一陣，小惡霸嘅媽媽終於出現，喺老遠行過嚟問咩事，然後爸爸講述事發經過

媽媽就問小惡霸：「你有冇打人？唔可以打人，你想要可以用口講」小惡霸就堅持佢冇打人

睇到呢度我就俾我女拉咗去第二度，不過之後我有留意小惡霸媽媽到底係喺邊，原來佢一直同幾個媽媽朋友坐埋一邊傾計，而我一路玩亦都聽到唔同家長討論小惡霸，有個重話佢係周圍辣火頭

其實，如果你明知你自己個小朋友係會出手打人，每次打完人俾你溫柔地教訓完都係冇改變嘅，係咪應該跟實個小朋友，從旁教導，喺佢動手前阻止呢？唔好下下都等佢打完人，人哋投訴或者俾其他人鬧，你先施施然行過嚟問咩事，好嗎？

讀者投稿@古媽