#ParentLicenses2820

話說早幾日喺新城市廣場行街，去到一田嘅時候，咁啱見到有個架賣緊一啲日本啫喱

我同朋友睇緊啫喱嘅時候，突然間有個頭伸咗出嚟，而且同我個頭非常之近。如果佢唔係一個𡃁仔嘅話，我絕對會以為佢係變態

其實當其時我哋知道自己企嗰個位，係啲人行去排隊俾錢嘅位置，但雖然係咁，我哋後面其實仍然有一大條路可以通過。我哋因為怕阻到人，已經盡量貼晒埋個貨架度，剩返大概唔夠半隻腳掌嘅位，無奈啲貨物就係喺嗰度

我要澄清一下，雖然當時唔記得影相，但係我後面真係大把位，所有人都係經過我哋後面然後去排隊，其實都唔可以話排隊只係行去收銀處

講返件事，當我同個𡃁仔兩眼對望之際，佢已經喺我前面夾硬打橫「攝」過嚟我同我朋友。我呆一呆，就同佢講：「弟弟，後面有位㗎喎」

因為個弟弟即刻講咗聲唔好意思，我亦都冇再出聲，本來件事已經完美解決，但佢老母唔忿氣個仔道歉，然後大大聲喺度講：「阿姨，你阻住排隊呀！」

我唔明白係明明後面大把位，點解一定要喺我哋前面行呢？而家啲家長就有一個問題，就係「跌咗落地都要執返拃沙」。明明個仔道咗歉就應該算數，點解硬要衝出嚟柒？

我好有禮貌咁同佢老母講：「姐姐，後面重有好多位，唔一定要喺前面迫。個貨架擺喺呢度，就係俾人攞嘢睇嘢嘅。如果呢個位唔可以企喺度攞嘢，佢就唔會整個貨架喺度啦」

跟住佢老母就用一副好肉痛嘅眼光望住個仔，然後拖住個仔唔知講咗啲乜。真係多得呢啲怪獸家長，先至有今時今日嘅廢青

如果呢位家長都喺呢個group，你真係要反省一下，第日個仔變廢人，都係你搞成。個仔明明好地地已經道歉咗，我哋亦都唔係得勢不饒人，亦都係好聲好氣同佢講，你就好似攞住個機關槍咁

相片來源@九品芝麻官
讀者投稿@又係路人甲