#ParentLicenses2208

我喺零碳嗰個最多人嘅巴士站度等車，突然間聽到有人好大聲咦咦哦哦係咁鬧，再留心一聽同望一望，發現係一個媽媽同一個應該初班嘅幼稚園生，我估三四歲左右

媽媽不停重覆鬧個小朋友：
「叫你行快啲你又唔行，而家五點九架車走咗啦」
「仆街啦你，五點半放學都唔知你點可以搞到成半個鐘都未行到過來」
「你死啦，要成七點先返到屋企」

呢段說話喺我等車等咗十五分鐘左右嘅時間內重覆咗四五次，所以我完全背得出啲內容。雖然聽落好差，但中途小朋友有唔耐煩時，佢媽媽係有做安撫行為，例如好似小朋友痕，媽媽有同佢搲；小朋友想喊，媽媽有同佢講：「俾你睇Baby Shark啦；或者媽媽亦見到要等咁耐，就建議去公園坐一陣

然而，個媽媽只係中間不斷穿插住上面嗰段好負面嘅說話

小朋友孭住學校書包，我查到行過來應該需時五分鐘左右。其實小朋友隻腳生得咁短，佢唔會好似成人咁，想行得快就快，佢嘅肌肉都未發展得好，而且小朋友專注力都係一般，會被其他嘢吸引咗過去

無論點都好，小朋友行唔得切，趕唔到車，都唔應該鬧到咁難聽。所有人都係透過錯誤換來經驗，而換來成長。今次佢行得慢而錯過咗架車，令佢要再等二十至三十分鐘，相信下一次佢就會記得「我上次行得唔夠努力，又熱又多人又要等好耐，今次我要努力」。當然佢可能下次都會行得好慢又趕唔切車，但要明白到教育應該要係客觀、理性、耐心，經過不斷不斷嘅練習才會成長，呢啲係多年嘅教育學家得出嘅結論來

即使我當時好想同媽媽咁講，但我明白媽媽情緒唔係咁穩定，如果我突然去提醒，惟恐媽媽有八成機會會情緒大爆發，最後受驚嘅只有小朋友

另外，有時睇到呢個群去描述啲有關嘈交嘅事，希望各位無論係父母或純粹係花生友，都懂得控制自己情緒。小朋友見到大人大吵大鬧，佢哋都只會受驚同不知所措，最後對邊個都唔好，嘈完亦唔會有金執

可能你覺得自己好啱、好嬲、心難平靜，咁嘅話你可以諗一諗網上留傳嘅一張圖，然後大聲講：「你講得好啱」😂

讀者投稿@X小姐