#ParentLicenses2694

我今年四十幾歲，已婚，育有一子

今日我生日，趁將到母親節父親節，想藉自身經歷，勸籲準備生二寶嘅家長諗清楚，或者已經有多於一個小朋友嘅家長，審視一吓自己如何對待各子女

我生於一家四口基層家庭，父母從事體力勞動工作，有一姊相差數年，兒時住公屋

不公平對待，從小已經開始

我理解家貧，我穿嘅衫褲鞋襪都是二手。可是我與家姐身型不同，佢高瘦，我肥胖，往往穿不下佢嘅舊衫褲就會被責怪，害到父母要花錢買新

兩姊妹同一個月份生日，但只有家姐有開過生日會

小學時期，父母均要工作，平日會分別預備兩個保溫午餐飯盒，家姐享用的那一盒，永遠份量多，食材佳

基於家姐大我幾年，父母返工兼且留我們在家之時，家姐就會自行充當家長去「管教」我，例如當我有功課唔識做，問又鬧，錯又鬧，想食嘢又鬧，怕水怕洗頭重會打我，更試過塞我頭落馬桶

打電話同呀母親投訴被打，只會話我「阻住佢開工」「講夠未」「喊夠未」。至於阿父親，就算我冇向佢投訴，只要佢放工返嚟見到我喊，就會鬧我「喊喊喊，喊衰晒，好即刻收聲，唔收聲就打」。我都數唔到幾多次因為被個家姐欺壓欺凌喊，而俾呀父親打

當年葵興某國貨公司執笠清貨，我嘅父母見我試戴一件仿象牙手鈪，竟然直接帶我走而冇俾錢。雖然我當年只係K3或小一，但已經歪曲咗我嘅事非黑白同價值觀

資源只會給予家姐，佢有琴學，有補習，甚至乎係當年唔便宜嘅快譯通，家姐只要開句聲就有。反而當我想要部遊戲機，就要等價交換，考到頭三先會買。當然，唔係尖子嘅我點會考到，我天真到改成績表，冒簽名。冇帶或冇做功課，將同學份功課偷偷改成自己嘅名

結果，佢哋所謂教好我嘅方法，係帶我去道堂，話我撞鬼。其實我嘅問題，只係因為阿父母嘅偏心偏坦，而有「心魔」

高小期間，我經常因為身型、舊衣物、舊用品等原因，被同學言語欺凌。對於兒時在校社交，父母從來不聞不問。相反，佢哋好了解我家姐身邊有咩朋友

升中，就算班主任向呀母親說明我成績唔達band1，為咗可以執舊書、校服、校址近、慳車費等原因，阿母堅持己見，結果全班得我一個讀band3中學，從此佢哋呢三位家人更加睇我唔順眼同睇唔起

我試過想去改變佢哋嘅想法，好努力讀書溫習，全級成績去到頭十名內，重拎到一科最佳成績，獲得獎學金，卻只換來一句「band3學校，有咩咁巴閉！」

心如死灰同時學壞由此起

我壞到去偷錢、盜用信用卡、逃學、離家出走等等，到咗嗰陣，佢哋先好似發現有我嘅存在，驚覺我做錯好多事，亦擺出仁慈嘅態度話，只要我肯改過就得

但現實始終係現實，偏心就點都係改不了

從變壞後改好呢三十年，凡有咩嘈吵都會對我講一句「以前你做錯咁多嘢，我地都買個琴俾你呀，咁多年都冇道歉呀你」

除咗將我做錯嘅事無限重播，對我個仔亦一樣

以往每星期日都會返去食餐晚飯，自我仔大到可以同枱食飯後，佢哋就開始左挑右剔。每餐唔係話我仔食得慢，就係話佢望電視、眼瞓、玩到攰、無謂口，總之呢啲全部係錯。每次都上演大龍鳳，鬧、喊、打、道歉，呢啲情況，我忍到我仔升小一

導火線嚟啦。嗰年咁啱我嫲起骨，有儀式要辦。阿母親一個多月前通知我老公同我請假，因為要車佢哋去墳場。嗰幾年COVID，年假都用得多，所餘無幾，每請一日都用到盡，咁我自然問清楚起骨儀式嘅時間，繼而安排我仔同日去學英文嘅機構做assessment，上山做儀式前一星期亦再次表明相關安排。儀式前嗰日，家姐叫我放低個仔俾佢老公湊，我捥拒咗，因為我仔都升小學，唔係話太細唔方便去嘅小朋友

大家住同一區，上山當日，要先去接阿父母，最後再去接阿家姐同佢老公，點知話佢老公有嘢做唔去；相反，我老公一個月前被要求出席，重以為係大事，係必須

車程連儀式兩個鐘左右完成，打算按之前嘅安排去荃灣食飯，因為帶仔去做assessment。點知家姐就話冇聽過，話約咗佢老公一齊返大西北食。知情嘅母親亦可以即時失憶，話冇聽過，果然有啲料

返到大西北之餘，重要去佢老公屋企樓下接去酒樓。算！畫點心呢吓先勁。家姐話為免大家要洗手由佢點，點完好有禮貌問大家有咩要加。我老公講咗三樣點心，三樣都冇叫，當時阿家姐話佢兩公婆唔肚餓，所以唔叫

你哋唔肚餓，但係要我哋遠道接送大西北一齊食。你哋唔肚餓，但會點自己食嘅嘢，肚餓又想食嘢嘅人就唔可以叫嘢食？父母竟然重覺得阿家姐冇問題，反而話我黑面唔啱，話我哋呢一家三口唔夠飽可以去食嘢

我老公當日最早起身，早餐食咗少少嘢就揸車由大西北去TKO來回，一共三個幾四個鐘，揸車唔使精神同體力嘅？唔可以肚餓嘅？冇好似UBER咁收返車錢，亦冇話餐飯唔俾錢。佢地嗰啲咁嘅講法同行為，真係丁點尊重都冇

發生呢件事，我將我屈咗咁多年嘅嘢一次過講返晒出嚟，每件事都話係我小器同計較

我話：「你哋識嘅人生日，包括我啲表姐表哥（母親啲兄姊既仔女），後輩你哋都會講聲或者留言生日快樂同一啲祝福說話，但咁多年都唔會對我講一句。唔好話想你哋同我食餐飯慶祝啦，我老公早幾年買蛋糕一齊食，你哋唔係話難食，就黑口黑面，借意話去晾衫唔食。之後重特登喺生日前提我哋唔好買蛋糕，冇人鍾意食喎」

明明父親喺院舍工作，經常都會有生日會有蛋糕，有糖尿病嘅佢，重會將食唔晒嘅蛋糕拎返屋企食。阿父親父親家姐姐夫生日，同樣我買返去嘅蛋糕，就會開開心心影吓相之後先食

父親就話我：「生日年年有，有咩好慶祝，自己從來咩節日都唔慶祝，以後都係」

母親就話：「因係我阿媽即係你阿婆係難產死嘅，所以生日唔應該慶祝，生仔踏咗半隻腳入鬼門關！」

原來佢哋覺得生仔咁嚴重咁危險，但點解我生仔住幾日醫院，都冇嚟望過一眼呀，叫我唔好返去坐月呀之類？相反家姐做個婦科小手術，可以返娘家休養呀？

我碎到一地嘅玻璃，唔係一時三刻造成，而係累積咗三四十年，寫出嚟嘅都只係部份

「種瓜得瓜，種豆得豆」呢句除咗用喺學習，同樣可以用喺愛——父母對子女嘅愛

若果你預計自己會偏心，真係唔好生多個！

讀者投稿@何必有我