#ParentLicenses1531

我今年37歲，未婚，同屋企人一齊住

踏入社會工作開始，我就將成份糧交俾我老母管，每個月佢俾生活費我。可想而知我係月月清，但仲要俾佢話我儲唔到錢、大花筒……我唯有搵多兩份兼職，而兼職嘅錢當然由自己keep

當我每次同佢講親想自己管返份糧，佢都係一哭二鬧三上吊咁，嚇到我都唔敢再提呢個話題。佢話啲錢係幫我儲起喎，又之前因為卡數問題，所以唔俾啲錢我管

反觀我兩個細佬，佢哋可以自己管自己份糧，成日都身光頸靚，我就著嚟著去都係嗰幾件

久而久之，兩個細佬都睇我唔起，覺得我好廢。係咪真係有嗰抽嘢就矜貴啲？

你哋一定問我點解唔反抗，我真係好驚如果我話要獨立嘅時候，我老母會有咩反應——佢有高血壓，我唔想背負「激死老母、不孝女」嘅罪名

自細老豆老母都話我好乖、好孝順，但係而家聽呢兩個字，我真係好大壓力。男朋友都唔只一次因為我屋企人嘅嘢同我嘈

我心真係好累，幾時先可以解脫？

圖片來源@我是為你好 by Yemao
讀者投稿@裙腳女