#ParentLicenses2846
唔係話初學游水就大晒,但安全問題真係唔可以講笑,我想同大家分享下近日喺公眾泳池發生嘅一件事
適逢假日我帶我6歲小朋友去公眾泳池游水,佢剛學識自由式,慢慢建立緊信心
當時差不多游完準備上水,而因為兩邊池岸都企滿咗學游水嘅小朋友同教練,為咗避免小朋友衝過去撞到其他人,我哋兩個大人睇過四周,確定2號線附近(大約一兩米距離)完全無人行/游緊,就安排小朋友喺呢個極短距離橫游過去岸邊快快上水,我哋兩個大人全程喺後面緊密睇住
小朋友出發前,我哋同佢都再次睇過周圍無人,但點知游到一半,遠處突然有一個企喺水度嘅女人,見到小朋友游緊過嚟,佢唔單止冇停步或繞步避開嘅打算,反而加速行過嚟
最令人震驚嘅係,如果佢怕被撞,正常人本能反應一定係停步、縮一縮身或者側一側繞步避開,但佢居然係主動伸直隻手,追住小朋友個頭嘅方向,打算直接按佢個頭落水
當時兩個人嘅位置,佢只要企喺自己原本個位縮一縮,係完全可以避開,根本唔會交叉撞到。我哋兩個大人四隻眼睇得好清楚,佢隻手完全唔係左右撥開,而係做緊上下動作想按小朋友個頭落水,好在我哋見到即時叫停
當時小朋友游緊自由式,根本睇唔到周圍。我哋大人見到佢個動作咁危險同主動,情急之下出於本能,已經唔係想怪責啲乜,只係即刻叫停佢:「唔好行住,讓個小朋友過埋先啦,唔好按佢個頭,好危險」
其實我哋當時純粹係本能反應,只想保護小朋友唔好有危險,同時亦係提醒佢避免被撞到。大家順利游埋嗰幾步相安無事,對方又唔會被撞到,何樂而不為?我哋身為大人,見到呢啲危險動作無可能會唔緊張
對方好似早有預謀、背好晒台詞咁,即刻企喺道德高位大聲發難:「游水邊有人打橫游架?你哋撞落我度唔痛咩?!」
我哋已經即刻捉返起小朋友停止再游,都有解釋我哋準備上水,唔係不停打橫喺泳池游
備受責罵後我哋真係極度無語同心寒。第一,你故意加速同伸直手,當時你只係企喺水度行,眼見小朋友游過嚟,縮一縮就避到,但就選擇加速兼伸直手追住小朋友個頭嚟撳;第二,你明顯係處心積慮去說教,明明我哋出聲係雙贏嘅提醒,佢唔係檢討安全問題,反而好似一早預備好台詞咁大聲說教,企圖用道德高位包裝自己欺負小朋友同家長嘅行為;第三,你事後狡辯改口話:「我唔係同小朋友計較,係同你計較」,話我屈你撳我小朋友個頭落水入面,完全係想為自己對小朋友做危險動作搵藉口!
如果真係差幾秒發現快要撞到,出於本能想撥開,第一句講嘅都應該係「小心」或者「撞到啦」,而唔係處心積慮好似諗好台詞咁去教訓人。我事後諗返,真係非常質疑佢嘅動機係本能自衛,定係想企喺道德高位準備寸人、搵小朋友嚟蝦?
試問如果今日係一個游緊自由式嘅大人向直線游過嚟,佢會唔識停同避?會唔會白痴到企喺度伸隻手去撥開個大人個頭?識游水嘅人都知,游自由式有時真係好難睇得到前方,好多時都係靠一開始睇定個池會唔會有人殺出。加上公眾泳池非循環線位置,大家有默契即使游自由式都會游幾步停一停睇睇,如果泳術好一氣呵成嘅早就去咗循環泳線
公眾池大家都會互相體諒,我哋絕對唔係話初學或者小朋友大晒,明明已經好努力令小朋友做更好、唔會阻到或者影響人,都仲要俾呢啲臭口人士說教,真係好無奈
小朋友得6歲,游緊自由式,萬一被撳頭落水飲水甚至入肺,後果可以好嚴重。撫心自問,呢啲所謂嘅「道德人士」,到底係真係維護正義,定係心地唔好借道德名義欺善怕惡?就真係得佢哋自己先知啦!
讀者投稿@無奈的家長
