#ParentLicenses2809

我是新手家長，小朋友N班，有一事請教各位🙏

事源學校有提供啲塑膠玩具車俾小朋友玩，就喺放學時間時，個個小朋友都想玩，你哋認為做家長可唔可以霸住架車，再等個仔嚟玩？如果有其他小朋友想玩，家長係唔係都可以唔讓呢？

當日我接完仔仔放學，阿仔見到有架車冇人玩，就想過去玩，但側邊企咗個男人，個男人頂住車門，暗示唔俾我仔玩

我仔兩歲半人仔當然唔理解，堅持要上車。個男人遂同我仔講：「你玩第二架啦！」

個男人之後更拎起架車仔，離地轉走唔俾我仔上車。我仔同個男人爭持不下十秒左右，我個仔終於放棄，去第二架冇人玩嘅玩具車

點知第二架車旁邊又企咗阿婆喺度。阿婆又講：「有人㗎！」

我仔今次唔理照上，個阿婆放棄行開嘅時候就講咗一句：「嗰隻嘢夾硬嚟！」

嗰下心嬲咗，但我冇同佢哋去理論，因為始終呢度係學校地方，現場有咁多小朋友，我唔想爆情緒出嚟俾小朋友見到

呢個幫小朋友霸車仔嘅做法，係家長間嘅不明文規定？

讀者投稿@匿名