#ParentLicenses2804

事情發生喺尋日，我喺一日之內三次撞到同一對小朋友，佢哋嘅行為令我忍唔住要投稿上嚟讚揚一下
.
第一次見面係中午，嗰時我出街買嘢，落到樓下時，見到有個睇落係讀緊高小，年約9-11歲嘅女仔跑過，後面就有個工人同行，工人就帶住一個明顯係學緊行路嘅BB仔慢慢跟住
.
當時只係覺得呢對小朋友幾可愛，無特別留意佢哋。直到下午，我去樓下公園附近等人嘅時間，碰巧又見到佢哋喺公園入面玩
.
BB仔喺滑梯設施上面玩緊軚盤時，見女仔一邊幫手轉動軚盤，一邊捉住BB仔條腰，時而特登跪低同BB仔面對面交流。最抵讚嘅係個女仔其實佔用咗大半條滑梯設施，但當其他小朋友要玩嘅話，佢會主動讓埋一邊。另外都一樣抵讚嘅係，BB仔後來要落返地面，雖則由工人抱佢落地，但個女仔都跳落地再喺旁邊傍住，似係怕BB意外跌落去
.
女仔對BB仔溫柔又細心嘅舉動，睇落好溫馨兼且有愛心
.
後來喺下午六點幾，我去超市買完嘢，正於返屋企途中，我第三度撞到呢對小朋友。惟今次唔同，佢哋有爸爸陪同，我估佢哋應該係一齊返自己屋企。去到佢哋那座樓門口，爸爸打開門，BB仔可能見條路多人行，就企喺中間一直唔郁，女仔就帶BB仔行入去。佢哋入咗大堂後，我望到個女仔不停彎低身睇個BB仔
.
我喺度住咁多年都未見過呢對小朋友，一日之內竟讓我撞到三次，我覺得係特別有緣份，亦都令我睇清楚佢哋。雖然而家社會上有好多無家教嘅小朋友，但係都有一班懂事嘅仔女嘅。個女仔雖然年紀輕輕，但觀察到佢對BB照顧得好周到，莫講話小朋友，連某部分大人都未必做得到
.
尋日見到嘅每一幕畫面都令我覺得好溫暖，相信個女仔係有受過家教先咁錫個細佬，佢嘅行為係非常值得讚賞
.
█ 字數👉🏻(節錄) 660 / (總數) 660
█ 全文👉🏻https://parentlicenses.hk/?p=8405
█ 備援👉🏻https://backup.parentlicenses.hk/?p=8399
.
相片來源：WhatsCap
文章來源：讀者投稿@ B