#ParentLicenses2801

話說自己個小朋友去學興趣班，呢一班都比較多人，所以一個導師會將小朋友分唔同嘅程度組別，輪流去教

喺離開嘅時候，其中一個家庭嘅一個媽咪就一路行，一路好大聲同佢個小朋友講：「你哋都係曳啲啫，點解個導師會唔教你哋？有冇搞錯！」

佢再問個小朋友：「佢有冇教你呀？」

小朋友答：「冇呀！」

媽咪：「人哋蝦你，你哋要團結呀！」

小朋友：「咩係團結呀？」

媽咪：「即係人哋蝦你哋其中一個，你哋另外兩個要幫手！你哋係一家人嚟㗎！」

我作為老母都聽到一頭霧水

第一，你冇全程喺現場，你見到只係一part，就算你覺得有問題，都唔應該咁教自己個小朋友。同埋都冇人蝦你哋，導師都係公平咁去教唔同嘅組別

第二，第一堂就係因為你哋3個小朋友之間喺堂上爭拗，其他嘅小朋友同導師就用緊大家上堂嘅時間等你哋ready

作為父母一定會明白唔會想每個小朋友都成舊飯咁聽話，但希望你都體諒唔會將所有課堂嘅時間只係專注咗喺你嘅小朋友度，同埋吸收到幾多都要靠你小朋友自己

讀者投稿@家長