#ParentLicenses2792

新鮮滾熱辣

啱啱呢程機由沖繩返香港，機內應該有幾家人同埋佢哋嘅小朋友（目測一兩歲至五六歲都有）同行，一齊去旅行後回港，而可能佢哋冇揀到位，所以前前後後都俾佢哋幾家人夾住

啲小朋友由上機開始扭計、踢櫈，咩都出齊，中途試過忍唔住叫空姐搞搞佢，都係幫助不大

未幾，我隔籬個阿叔忍唔住，佢解除安全帶企起身，再睥撚住其中一個，之後個仔就即刻唔喊（落機見到嗰個靚仔應該都係手抱、唔使買位嗰隻）

其實證明咗，父母係有能力控制啲小朋友，只不過父母唔去控制，甚至係其中一個去鼓勵啲小朋友咁嘅行為

我前面扭計扭到仆街嗰個兩歲左右靚妹（扭調位、零食、玩，有幾次見到佢根本唔可以用咩字去形容佢嘅動作，總言之就扭埋一舊嘢咁樣），落機嗰陣佢老母重要同佢講：「好叻啊，冇扭計」

我聽到佢咁「讚美」之後，一嚟唔知佢平時屋企點為之叫做扭計，二來個靚妹聽到咁樣之後，佢更加覺得自己喺呢度嘅行為係冇問題

我從來唔會怪小朋友，只係覺得生仔真係要考牌

讀者投稿@夾心人