#ParentLicenses2791

尋日喺泳池游水，標準池50米，9條線中間有浮波隔開

我游緊6號線，游到一半，突然見到5號線有個男人同一個約8-10歲男仔，打橫游過我條線。我即刻減速踩水，望清楚先繼續游，重忍不住同佢講：「唔好喺中間過線啦」

後尾老公游過嚟，我同佢講咗件事。過咗一陣，嗰對父子又過線游返嚟，我終於忍不住同個男人講：「先生，你哋啱啱喺中間過線，我差啲撞到，下次可唔可以唔好咁過？」

可能我語氣有啲嬲，個男人即刻扮無事，之後先勉強講聲唔好意思。我就同佢講，阻到人重帶住小朋友，好易出事

點知佢突然發難，大叫：「夠啦！我咪道歉咗囉！小朋友啱啱唔舒服！你未有小朋友唔明㗎！一啲同理心都無！」

我即刻回佢：「小朋友唔舒服就快啲帶佢埋岸啦，唔好喺度嘈。」佢游去隔離線都重繼續嘈，上岸後更加手指指住我呢邊

最搞笑係，如果小朋友真係唔舒服，喺自己條線游埋岸最快，又點解要越線潛水過浮波呢？

呢個男人重鬧咗好多嘢，話我喺公眾地方唔守規矩，又話我咁多要求就唔好嚟公共泳池。總之就係一句：「我帶住小朋友就可以打橫行」

平時見到呢類事我都懶得理，但今次我真係有啲嬲。除咗因為佢阻住我游水，我更加喺呢個男人身上見到我爸當年嘅影子

我爸媽離婚十幾年，我由大學畢業後就開始好憎佢。佢就係嗰種唔守規矩、又唔講道理嘅人。細細個我已經記得佢喺街頭因追巴士不成，走去踢車尾嘅樣

我好怕自己會受到佢嘅壞脾氣影響，所以一直努力反省自己有冇對身邊人做得唔好。到而家都未生小朋友，一半原因就係諗緊點樣先可以做個好家長，唔想將來令小朋友因為我嘅行為而有陰影

真係好糾結

相片來源@游客
讀者投稿@游客