#ParentLicenses1487

話說今日天氣係非常晴，完全無雲，去咗有老鼠嘅樂園玩

本以為好開心咁提早15分鐘去睇巡遊，完全無雲嘅情況下等了又等，曬到溶，我就開咗把迷你縮骨遮幫我小朋友擋太陽

終於開始巡遊，人們就驚死睇唔到咁，開始越逼越埋，事情就喺哩個時候發生！

我感覺到有把女人聲不停話：「你大晒咩」「咁無品」「得你一個睇晒」

我之後甚至感覺到有人係咁打我把遮，我向後望嗰位女士幾次，每望一次都有10秒以上，佢都係無當面話我，我一望向前就不停話我！

到有一下打到我把遮都向前，我就問嗰位女士：「做咩要不停喺我背後鬧我同打我把遮呢？」

女士就好無禮貌地回答我：「你把遮整到我個囡！」

我再望一望，佢個囡高過我，我攞把遮向前，而佢喺後面，我點會整到佢呢？

我就話：「如果我整到你，你大可以直接同我講，唔好打我把遮同喺我背後指桑罵槐，大把人都係開遮睇巡遊，你唔逐個去鬧佢哋？」

「就算你個囡都成10+歲，我個囡得5歲，我遮住個囡嘅高度點會整到你？點解」

女士回我：「得你有囡，我都有囡，我個囡都怕曬！你係有病！」

我就藉著佢話「你係有病」哩句說話就報警告佢誹謗

未幾，就有工作人員過嚟幫手處理！喺哩個時間，有個好多事嘅肥師奶就行過我面前話我唔啱，仲出言侮辱我：「有爺生冇乸教」

其實肥師奶係遲來後面再後面，根本就唔知來龍去脈，我亦藉著哩句說話「有爺生冇乸教」告佢誹謗！

肥師奶聽到我要告佢就想逃走，之後警察到場處理事情，然而嗰名女士仲要說大話

佢話我係打佢尖，所以把遮先整到佢，又話自己有示意說明畀我知我係整到佢個囡！

好彩有幾名工作人員幫我作証，証明我係比嗰名女士同佢囡囡早到，對方最後都係要道歉！

我本人都非常有教養，亦不是「有爺生冇乸教」嘅人，我亦係非常重視身教

我有同嗰名女士講：「如果我把遮有整到你，我願意同你道歉，但你個囡喺度睇到晒一切，你說大話，佢會學你，出手，佢會學你，身教好重要！」

我同時希望另外嗰名好多事嘅肥師奶藉此有個教訓，以後唔好唔知頭唔知路就話人，怕事就唔好做厚多士！

讀者投稿@Mama