#ParentLicenses2759

香港人自小就學習排隊。如果小朋友忘記要排隊而打尖，通常爸媽都會即時阻止，並教返佢哋要守秩序。小朋友唔識，大人應該識

早前我哋參加跑步活動，完賽後大家排隊影相。我老公好心幫前面嗰家人影完相，對方亦提議幫返我哋影。不過因為我冇參加跑步，又拎住好多嘢，所以話唔使，自己影就可以

正當我哋排緊隊時，突然有四個大約八至十一歲嘅女仔衝去Backdrop，重自己轉動分秒牌。起初我以為佢哋只係貪玩，想郁下個牌，但之後見到佢哋父母就企喺我哋旁邊

我於是提醒嗰班爸媽：「我哋排緊隊呀」

其中一位媽媽一臉茫然，用廣東話回應：「唔知道呀！工作人員叫我哋過嚟呢邊！」

我即刻答：「咁都要排隊！」

然而，嗰四個女仔已經轉好時間，我老公就讓佢哋先影，重好心同佢哋講：「算啦，你哋都轉好咗，快啲影完到返我哋啦！」

我心諗，影幾張相最多一分鐘，點知原來佢哋唔止影相，更要拍片同做訪問！而且全程用普通話，由準備到完成足足五分鐘

訪問完結嗰一刻，我忍唔住大聲同佢哋父母講：「希望你哋將來可以教吓小朋友排隊，喺香港好多事情都要排隊㗎！」其中一位媽媽冇回應，只係以一個尷尬嘅笑聲帶過

其實我針對嘅唔止係小朋友打尖，而係嗰啲完全冇打算阻止小朋友嘅父母。或者，佢哋根本從未被教育過排隊呢種基本禮貌

讀者投稿@Hana