#ParentLicenses2746

曾經我都覺得小朋友應該要贏在起跑線，讀到名校就等同見到大學之路。小朋友愈大，我心境都出現變化，自小朋友升小學之後同老婆教育理念越來越有差距

家住新界西，當初老婆希望小朋友入讀名校，但我反對，我唔想小朋友每日花咁多時間坐車，我認為如果佢叻讀邊間學校都會叻。我老婆好同意，所以放棄區外名校。當初見佢又話搵happy School，做足晒資料搵學校，咁我都放手俾老婆選擇，最後都順利入讀一間屋企附近嘅直資小學

小朋友讀書其實唔算叻，又因為學校英文好似比其他津校深少少，所以讀直資追得好辛苦。自小一開始，小朋友每日放學都已經要全補，但成績都唔係十分優秀

老婆成日都呻，以前幾個幼稚園同學仔冇自己個小朋友咁醒，但人哋讀津校年年考級頭，年年有獎狀、書卷、獎學金，外出比賽又攞獎。然而，老婆仍然都係睇唔起人，只覺得自己小朋友先係最叻嗰個，妒忌加自卑到一個點。我成日聽佢咁樣呻，我都覺得佢好煩。每次都叫佢唔好比較，但係佢唔聽，佢覺得我冇上進心，又覺得小朋友有我咁嘅爸爸好失敗，更話我唔了解佢讀書情況，叫我唔好俾意見

今年升小四，家長群熱烈討論小四好重要，因為考直資中學要睇埋小四成績表。我老婆暑假開始已經癲咗，突然做咗個虎媽，每日迫個小朋友練琴一小時，每日都要出去補習，每晚都係喺街外食完飯先返屋企。放假又要上四個興趣班，嚟緊重要去考日文

尋晚因為小朋友唔舒服，老婆依然要逼佢練琴，小朋友喊住咁練咗半個鐘，之後喺度發脾氣踩到個小朋友一文不值，成日搵而家叻嗰幾個幼稚園同學嚟比較，但佢真係覺得人哋讀津校好垃圾，就算考級頭都唔代表好叻。佢竟然話人哋讀一線津校係垃圾學校，叫小朋友讀唔到就轉過去同班垃圾一齊讀書。我真係忍無可忍同佢嘈到想離婚，之後帶咗小朋友去睇醫生，去爺爺屋企暫住休息幾日

我真心想佢開心學習，但我見呢幾年佢連上興趣班都失去興趣。小朋友越來越少笑容，通常佢最輕鬆嘅時候就係媽咪去沖涼，我同佢一齊偷食零食嘅時候。有時見佢咁辛苦，完全違背咗我當年出世時嘅願望係小朋友身體健康，開開心心。或者我真係好似我老婆口中講嘅失敗者，係我唔明白佢嘅用心？其實我哋兩公婆都唔係B1名校出身，細個父母冇咁樣逼我哋讀書，靠後天努力順利大學畢業，努力工作依然可以有小成就

其實小朋友英文唔好，小學已經好吃力，中學係咪一定要入B1英中呢？讀B2中中係唔係代表冇前途？其實我幫佢轉校，轉個新環境可能會更好。但老婆極力反對，佢覺得因為你唔叻，所以先要走。但我認為就係因為唔叻又唔開心，更加要走

我哋兩公婆冷戰緊，我老婆又追開呢個page，或者聽吓其他人意見，可能我呢個爸爸都做得唔好，心好煩😮‍💨

讀者投稿@唔合格爸爸