#ParentLicenses1480

話說於某個星期六搭鐵返工，喺轉車站上車，咁啱我坐到個關愛座隔離嘅普通位

本身要照顧家中小baby嘅關係，成個人都好攰，但為咗令自己唔好坐到飛站，梗係篤下電話令自己唔好瞓著

當列車到達尖東，就有一家四口上車。媽媽拖住個目測10歲嘅女，而講法文嘅爸爸就推住BB車，載住佢哋大概5歲嘅仔仔

個媽媽一上嚟就拖住個女指住我話：「哩度係關愛座，唔該你起身俾我個女坐」

我當下即刻黑人問號？？關愛座？？佢講梗我隔離個兩位？？

係我仲發梗呆，懷疑梗人生嗰陣，喺我另一邊都係普通位嘅女士就讓咗俾哩兩母女一齊坐

我見佢都坐低咗後，就懶再理佢哋，繼續篤機

點知就俾我聽到個媽係咁同佢女講：「哩度成行都係priority seats嚟㗎，係for children，not for adults」

我忍唔住話：「其實關愛座只係最側邊嗰兩個，其他嘅都係普通位啵」

然後佢就又鬧我：「哩度成行都係priority seats，係俾小朋友，唔係俾你坐㗎！」

我再話：「Sorry，哩個真係唔係關愛座。再講，其實任何人有俾錢搭車嘅，都有權去坐每一個位置，唔係剩係俾你個咁大個嘅女女！」

本身仲想繼續教育下佢，可惜我已經到站要落車

但當我想落車嘅時候，佢嗰位法文丈夫係要擋住我去路，唔俾我落車

係啦係啦係啦係啦，知你好x型

可能我見識少，真係未見過啲咁野蠻嘅人，仲要係做人父母，咁教啲小朋友

如果關愛座真係只准小朋友坐，咁老、弱、傷殘、孕婦係咪唔使坐？

再者，一個人就算外表睇起嚟好健全，但你永遠唔會知道佢係咪有啲乜嘢傷患病痛

讓係人情，唔讓係道理。唔好情緒綁架其他人，無任何人要為你嘅小朋友承擔照顧嘅責任。

如果你真係要你小朋友出親街都有位坐嘅，煩請你去call的士

讀者投稿@返工前想休息下嘅小薯