#ParentLicenses2736

自知唔係天資聰明嘅人，自小讀書成績平庸，讀書時成日被人話牛皮燈籠，就連自己家姐都會話我蠢，由細都大無咩自信。呢種負面情緒去到大個出嚟做嘢都冇改變過，一直打份牛工到而家。理想？早早拋諸腦後

婚後生咗兩個女，大的有小聰明，獨立有自信，而可惜係細女就好似自己影子咁，唔係好似家姐咁醒目，成日要人提點。直到妹妹升上小一，擔心嘅事終於發生——每晚教功課教到大家都唔開心

明白小一要適應，亦都好明白，同一彼岸，基於每個人能力唔同，用嘅力氣游過去都唔一樣，然而我內心嗰種恨鐵不成鋼嘅心態令我好扎心，好唔想個女好似自己咁，咩都普通平庸，個心好想快快扶佢一把。惟我愈心急，小朋友就愈唔開心，晚晚為完成功課都搞到大家關係好僵

妹豬，媽媽見到你，好似見到一個成日要被照顧嘅自己，媽媽好想你有自信，自己大個可以獨立處事，唔使好似媽媽咁，做個平庸低層，面對生活嗰種透不過氣嘅壓力令你拖垮，你知道嗎？

讀者投稿@平庸媽