#ParentLicenses2732

有咩衰過遇上一個無牌家長？答案係遇上兩個

最近有單兩個爸爸喺遊戲室起衝突嘅事，令我回想起幾星期前發生過嘅類似事件

遊戲室向來充滿一堆只掛住玩手機，但唔睇實小朋友嘅家長。有一日，當我那二十個月大嘅兒子喺一個闊一米嘅矮滑梯頂瞓低，正準備瀡落去嘅時候，就有個大約五歲嘅男仔（下稱A童）喺梯底行上嚟佢旁邊。A童諗咗兩秒，突專登一腳踩我仔個額頭度，喺我仔距離大約兩米睇實嘅我立即上前喝止

當時A童無人看管，我唯有大聲嗌要搵家長。等咗一段時間，A媽媽終於行過嚟問咩事，我咪如實話A童專登踩我仔個頭。個媽媽問完個仔後要求道歉，個仔隨即喺度喊，跟住就冇咗回事就咁行開咗

不久，有另一個家長（B媽媽）行過嚟鬧我：「我同那個家長同男仔熟，知個男仔係頑皮啲、答嘢慢熱啲，你咁大聲喝佢對佢心靈傷害好大，你都要同嗰個細路道歉喎」

我（黑晒人問號）：「我阻止其他細路踩我仔個頭，有咩唔啱呀？頭嚟㗎！如果被人踩到個頭嘅係你個仔，你係咪會冇反應呀？」

跟住B媽媽繼續話我大聲冇修養，然後喺遊戲室嘅其他時間都喺度大聲單單打打，話我大蝦細，好凶個五歲小孩

吓？我一句粗口，甚至侮辱嘅說話都冇，只係大聲喝停咗個細路，咁都唔啱？唔通我要好似班懲教職員好溫柔同歹徒講「先生唔好打交」才正確？

我深感委屈，而且眼見A童繼續喺個場度玩，一啲歉意都冇，請職員聯絡場地經理又唔肯，我咪自己上網查電話打去搵經理過嚟處理

個經理一聽到A童踩我仔個頭，都覺得太過分，遂入場捉返A童同個A媽媽出嚟道歉

A媽媽：「由於我仔話只係覺得佢個仔阻住，唔小心踩到佢，所以冇道歉」

我心諗：咩god’s logic來的？

我話：「條梯成米闊，你個仔隔離有咁多空間唔踩，係要去我仔身邊諗幾秒然後踩，明顯係故意。同埋嗰個係二十個月大小朋友個頭，而你個仔已經五歲，武力不對等，我先會大聲喝停」

最後經理都係要求A童道歉，並强調無論對方係幾多歲，身體邊個部位都唔應該踩落去

至於B媽媽，我再觀察多幾日佢點樣有修養法，發現佢都係由得自己個仔喺場地亂咁跑，撞到人都係就咁走咗去；B媽媽一直喺場地旁邊玩手機；同個仔溝通時中文夾雜語法同發音都錯晒嘅英文

以上對我來講都係十分反面的教材，連我喺外國讀書返嚟嘅，都唔會咁樣用中文夾雜英文溝通，亦唔會掛住用手機唔理個仔

總之，呢啲遊戲室冇質素嘅家長太多，我只能做到嘅係唔好淪落到好似佢哋咁就好了

讀者投稿@有故事的人