#ParentLicenses2727

時間：晚上8:30
地點：銅鑼灣站往柴灣方向車頭

究竟今時今日點樣做家長先合格？今晚呢對父母就完美示範咗啦！事緣疑似佢嘅小朋友喺月台就地解決（屙尿），一位睇唔過眼嘅瘦弱小姐姐好聲好氣提議「唔好喺度屙尿」——點知就撻著咗阿爸嘅「火星神經」！

即時暴怒手指指，狂鬧小姐姐「多管閒事」、「黐線」，大聲辯稱「細路仔忍唔到㗎嘛！係咪由佢瀨先啱呀？」（係呀係呀，全世界有細路嘅忍唔到都隨地痾㗎~）更離譜係，人哋無影佢，佢拎手機出嚟反拍人！重大大聲話：「呢度冇肖像權㗎！」（其實唔係咁大聲都唔會有人望佢哋）

最好笑係，呢位阿爸口講「搵職員囉我怕你啊」，但地鐵一到站就即刻同老婆阿仔一家逃走！Call緊職員嘅小姐姐叫都叫唔住！不過原來咁都未算最過分

上到車之後，呢位阿爸竟然同個仔進行「洗腦教育」:「個姨姨傻㗎，要睇精神科」、「爸爸保護你，唔使驚」、「我哋行得正企得正」

其實鐵站係有廁所！搵唔到都可以搵職員可以幫手！小朋友細個唔識，大人係要教㗎！香港公眾地方隨地大小便屬違法！而且未經同意惡意拍攝他人，可能觸犯私隱條例！

相片來源@睇唔過眼嘅路人們
讀者投稿@睇唔過眼嘅路人們