#ParentLicenses2712

我係一位準備生二胎、打算生完就移民嘅樂器老師。好多質素較高嘅家長近年都選擇離開香港，變相留低嘅學生家長愈來愈難服侍。今次分享的學生A，絕對係無牌家長之中最精彩嘅例子

學生A係我在家開班後第一個學生，幼稚園時期乖巧聽話，工人姐姐會陪練，佢亦配合度高。但升咗小學後完全變晒，態度無禮、語言粗俗，甚至鬧工人同老師

因為父母有出糧老師同工人，佢就認為自己係客可以有權鬧人；成日頂嘴、耍脾氣，令我堂堂都要做調解人，根本冇法好好教學，進度接近零

上堂前一晚玩到凌晨先瞓，第二日下午嚟上堂就扭眼瞓，跟住唔係發脾氣就係呆坐，有時重會攞樂器發洩，亂彈一通，但一落堂就精神奕奕玩手機，根本係唔尊重我哋班老師

佢最近搬咗去同其他家人住，就話環境唔啱佢、又細又冇自由。佢話父母明明有俾家用，唔明點解喺呢個屋企佢唔可以話事，而係要聽爺爺嫲嫲話，甚至叫父母買起佢哋間屋，以為錢就代表一切

講到學生A嘅家長就更加極品

學費「後數快」，試過幾個月唔俾錢，要我不停追數先會一次過交齊，完全冇責任感

請假理由五花八門，因病請假人之常情，但佢哋喺考試前、去旅行都例必請假；有好幾次去朋友屋企、返大陸玩等等，要去到last minnte先通知請假，有時甚至連請咩假都唔記得，要我問起去邊先至記起。有次話個仔病咗唔嚟上堂，點知下次見佢問病情，佢竟然話：「我冇病過，上星期因為去咗行山唔上堂丫嘛。」

如果由工人接送多會準時，但由家長親自送就經常遲到，五分鐘、半小時都有試過，當我係託管咁。更試過要求補堂或者唔扣堂費，我當然拒絕。

最近家長話工人唔續約，要我去佢屋企教堂，我拒絕咗後就開始出現各種藉口缺堂。前幾日，因颱風要做「超前部署」，我提議改早一日上堂，佢話驚個仔眼瞓（冇關係，佢幾點都咁眼瞓），但又回覆11:00得；點知到凌晨三點，家長話自己忙到而家先瞓，第二日唔嚟，又再拖延補堂時間。再問佢補堂時段，翌日下午先回覆話聽日12:00，但翌日11:55先話仔仔發燒，唔嚟喇。根本係上堂前幾分鐘先諗藉口

我都唔係要佢補返錢，只係想補番堂，點知佢話冇時間送個仔去上堂，就話唔上啦。教咗三年，連一級都過唔到，學生冇紀律、冇家教，我每日教到心力交瘁，心諗：都好，終於完咗，對工人姐姐同我嚟講都係一種解脫

好多家長唔明老師都係人，我有時因為上堂要推遲自己安排活動，臨時取消又害我白等，浪費時間真係令人火都嚟

唉，呻完就算，瞓覺，留返啖氣暖下個胎。不過如果大家鍾意食呢啲奇葩家長的花生，我唔排除會再喺度分享多啲

讀者投稿@有故事的人