#ParentLicenses2707

又到釣墨魚嘅季節喇！上個星期五，我同個朋友參加咗個釣墨魚團，本來上船到釣點都冇咩事發生，同行有三班小朋友都算斯文。心諗今次真係好彩，但點知一到開始釣就出事

架船唔算迫，大家可以企得好鬆動，釣得正開心嗰陣，突然有個疑似讀緊小學嘅女仔行埋嚟。我哋都好人，見佢行埋嚟，就俾少少位佢，反正重有位

但佢越企越埋，最後企到黐實我前面，我心諗：咩料呀？睇唔到我喺度咩？釣墨魚要拋鈎，動作都大，整親妳我點交代呀？我嗰陣基本上唔敢郁

個女仔企咗一陣都唔走，我忍唔住話：「小朋友，不如你行過少少啦，企到咁貼好危險㗎，等陣拋鈎整到你呀」

佢睥我一眼，行開少少，結果唔夠五分鐘又黐返嚟，而且一路自言自語。我終於爆：「你見唔到呢度有人㗎？行開啲啦，一定要貼到咁埋嘅咩」今次佢理都唔理我

未幾，我發現佢條魚絲唔知幾時纏咗落我嗰條，打晒結！嗰下chok又驚整親佢，嘥我時間我又嬲。佢就爬喺度自己解結，而我索性企喺度睇住佢，心入面爆粗唔停。我冇幫手，一來係唔忿氣，二來係驚佢亂拎條線搞到我，再有咩事鈎到佢就賴晒我。條友擺明係唔會聽人講嘅人，唔會搏

佢搞咗好耐都解唔開，終於叫佢媽——吓？原來佢阿媽一直喺距離唔遠嗰度企住！中間冇任何人隔住呀！搞到人咁耐都唔理，當我哋透明！

佢阿媽行過嚟都冇講句唔好意思，只係同個女講唔好再亂搞，但結果解唔開都係要我出手。搞掂後就又各自回位，好似冇發生過任何事一樣

之後個女又繼續埋埋嚟，今次聽清楚佢終於聽到佢自言自語講咩啦——原來佢係追燈！佢要等船家放落海盞燈，而我同朋友企咗正燈位，所以佢死都要攝埋黎，搞到我哋最後都避開佢去第二個位

換咗位冇幾耐就見佢攞住個西瓜周圍走。嗰晚個海都有啲拋喎，佢屋企人真係唔擔心佢飛落海咩？見佢離開原本個位，我哋以為可以走返去，點知返咗去冇耐佢又返嚟，今次終於有阿爸望住，叫做冇咁貼

到回程，我同朋友入咗船艙休息，隔離隔咗兩個位有班細路打機。原本冇理佢哋，點知有個男仔愈打愈興奮，由坐變瞓，再變爬喺度，而且踢咗我兩下！當我唔喺度咩？我叫佢縮腳，佢完全冇反應，家長又當冇事。最後我拍咗佢隻腳幾下佢先縮，但之後都繼續踢我幾下，我都懶得再講

最癲係個攝位女仔同佢老豆入咗船艙唱K，死霸住又一路入唔到歌，佢又係咁拍支咪，拍到船家都入嚟勸佢唔好咁嘈。唔單止唔停，更加將音響開到超級大聲，我捂住耳仔都痛！佢以為聲大就唱得好咩？成家人唔知係咪有病㗎

老實講，釣墨魚都幾危險，個鈎係倒鈎，條船又冇安全繩。帶細路出海真係拜託要一對一望住，唔好害人。如果控制唔到，「有病」嗰啲，真係唔好帶出嚟玩，真係危險㗎.

讀者投稿@對住垃圾家長冇野好講