#ParentLicenses2670

我係某playhouse嘅場務助理，嚟講下最深刻嘅生仔要考牌事件

#事件一

如果當日嘅時段（如A時段下午十一時至一時）唔係散場而係包場嘅話，我哋係會等客人到咗撳鐘，再開門俾客人嘅，而撳鐘位置同門口已經各貼住一張「按鐘後，請稍等」告示

其實由我個位行到去門口只消三十秒內嘅事，一聽到有人撳鐘就會行去開門，惟唔明點解無論大人好，小朋友又好，都總係有幾個會不停地chok道門

有次我開門（我向入拉），有個小朋友同時推緊道門，咁佢好自然咁仆咗一下，冇跌親嘅，但我就向後隙倒，差啲成個俾佢搞到瞓咗落地下

家長：「哇！你開門唔出聲嘅！」

我黑人問號，心諗：開門要出聲嘅咩？撳完鐘唔係正常企喺道門度等嘅咩？重要通知你「你好呀，我而家開緊門啊」咁？

#事件二

家長：「小朋友喺波波池入面撞瘀咗」

我心諗：咁可以點？成場軟墊加保護貼，你又唔睇住個小朋友玩，我重有乜可以幫到你？

我：「噢！唔緊要呀嘛？我哋有膠布同急救箱，你需要嗎？」

家長：「我唔係要呢啲！你哋啲設施有問題啦！小朋友受咗傷！俾小朋友玩啲設施咁硬」

我又心諗：鋪晒軟墊，所有柱位都係軟墊，你喺條街仆親又唔見你投訴政府嘅？

我：「真係唔好意思，或者可唔可以話俾我聽小朋友喺邊個位整親？等我加強保護」

家長：「……」

#事件三

家長：「你哋條滑梯太斜啦，小朋友瀡落去失平衡」

我：「咁可能要家長陪小朋友一齊玩，可能小朋友太細個」

家長：「而家係你哋條滑梯太斜囉！」

我：「咁我相信設計師都係經過量度，先設計呢個斜道俾小朋友玩嘅，冇理由瀡滑梯係直㗎嘛🥰？」

家長：「咁都得？」

我心諗：我都想問你「咁都得」

我：「我哋都建議家長同小朋友一齊玩，增加下親子互動嘅時間，或者可以陪小朋友一齊瀡。如果唔係，我哋都重有好多其他設施可以玩㗎」

家長：「冇嘢啦，搵你都冇用嘅！」

唔通你搵我可以成條滑梯拆落嚟再改變個斜度咩，就算你去搵我‎公司都冇用，唔會因為你個人意見，將成個設施重整，何況我從來都冇聽過人投訴呢個問題

#事件四

場地有部類似咖啡杯咁嘅嘢，係要用遙控去開嘅。我哋唔會長期開住，因為怕小朋友跑嘅時候會撞到

家長一入到嚟，我哋已經講話有需要玩可以叫我哋開，但仍然有好多懶醒目嘅不斷掹我哋個電掣（場地唔係勁大，所以個電掣係喺部荷花杯附近牆角），掹完再插電掣，閂電掣咁樣

先姑且勿論啲小朋友咁樣整個電掣係咪危險（呢個係你做家長需要教嘅嘢），我嘅角度係，壞咗你係咪賠償？電親又我唔啱？個電掣已經好隱蔽㗎啦，點解要咁對佢

仲有好多，下回分解

讀者投稿@被投訴既小薯staff