#ParentLicenses2668

體育館的遊戲室好多時都有一堆小朋友橫衝直撞，而佢哋嘅家長都有一個共通點——掛住用手機，唔理小朋友會否整到人

不過，通常整到人時，家長都會叫小朋友道歉嘅，但係我今晚就遇上了一件奇葩、無牌老母

平時我哋會同一位聾啞家長同佢個兩歲幾小朋友一齊玩（下稱家長A及小朋友A），佢會讀唇，我大多用簡單手語同誇張口型同佢溝通

今晚有個年約五歲、無家長在旁看管的小朋友（下稱小朋友B）跟其他小朋友追逐時整到小朋友A個頭。由於係今晚嘅第一次，小朋友B冇家長在旁，加上小朋友A的家長講唔到嘢（得「呀呀呀」聲）又話唔到人，唯有俾多次機會小朋友B，大家再睇緊啲

到臨完場，在場已經好少人，不過因為小朋友A唔捨得走而瞓咗喺遊戲墊上，企喺佢身邊嘅家長A同我即刻叫佢起身。而正喺呢個時候，小朋友B一個箭步跑去我哋度，然後專登跨跳過小朋友A就走咗去。如果一嘢踩中個肚，後果不堪設想

我見家長A嬲嬲哋，加上小朋友B的行為危及別人安全，我便揚聲問：「請問呢個小朋友嘅家長喺邊度？」

無人應機，但見到有個掛住用手機的媽媽坐在場外。不出所料，小朋友B行去「認領」那個掛住用手機的媽媽（家長B）

我就好聲好氣同家長B講：「你小朋友整到人……

然後隨即就展開了以下怪獸級對話

家長B：「你小心啲睇住自己個仔，我仔咪唔會整親你囉」

我：「你自己在場外冇睇住自己個仔，重好意思怪人？重有，你整到嘅係其他家長的小朋友」

家長B：「咁關你咩事？係都係個家長同我講囉。重有，你有咩問題咪直接同我講囉，做乜好話我個仔唔啱？」

我（改用嚴厲語氣）：「真冇家教，自己個仔做錯嘢，個媽媽重咁多辯駁」

家長：「好心你控制下你個情緒啦，點做人老母？整到人哋個仔，你代佢鬧人做乜？你個仔將來學晒你鬧人」

心諗你都見到家長A戴助聽器、得「呀呀呀」聲，而個仔又咁細，表達能力有限，你想佢哋點？但我為了不觸及家長A弱點，我繼續以事論事咁話個家長B

我一路打以上呢段文字時，喺度諗緊小朋友B個老母係咪精神有問題的，千錯萬錯都一定唔係佢同佢個仔嘅錯，重要欺負一個聾啞人士唔識鬧返佢轉頭。可能呢位老母平日在學校都係咁處理個仔啲問題啦

最後再次奉勸各位，如果有生完唔教、手機成癮、唔俾得人哋教訓自己小朋友嘅家長，麻煩你唔好帶小朋友去公眾遊戲設施，甚至誇張啲講，連街都唔好出喇

讀者投稿@A