#ParentLicenses2634

今日帶我女去精神科覆診，坐得喺度嘅，大多數都係SEN孩童嘅家長

喺等候期間，有個相對比較活躍，年約四、五歲嘅男仔周圍跑，又周圍去開人哋診室房門，騷擾到入面睇緊症嘅病人。男仔一而再，再而三嘅行為令入面啲醫護都忍無可忍，遂大聲嗌出嚟問：「玩夠未？！」

其實中間都已經有職員拎過啲紙筆俾個男仔畫下公仔，又拎咗啲玩具車俾小朋友消磨時間，想勸佢坐定定，然而當然係坐唔到過三分鐘啦

個小朋友又走嚟走去，今次就搞個醫院機械人。個職員就話：「邊位家長？可唔可以控制下小朋友？」

男仔個阿媽就喺隔離坐緊，即使聽見個職員咁講，佢都依然係眼皮都冇抬一下望下個仔，繼續機械人式咁講：「阿仔唔好玩啦，返嚟媽媽同你玩啦」

男仔都冇理佢繼續玩，直至人哋房內醫護咆哮出嚟嘅時候，佢都唔知原來係鬧緊嗰個係佢個仔

未幾，有個貌似高級啲嘅醫生經過，就指住問發生咩事？叫啲職員處理下個小朋友，搵啲玩具俾佢玩下咁啦，又查詢下個小朋友係排緊咩等等

個阿媽就立刻好似上身咁即刻彈起身！「係啊！佢好難搞嘅？！有冇得排快啲丫！我都控制唔到佢㗎！」

職員冇睬佢，阿媽又坐返低，繼續撳返佢個電話，然後就拎個化妝袋出嚟補妝，同時繼續機械人式而又冇用嘅訓話，而個小朋友就唔理佢繼續玩

最後到佢診症期間，阿媽入咗醫生房，但個仔係不停出出入入玩門鎖，出嚟時刻意踢啲等候嘅人隻腳。玩咗十幾次之後，有姑娘都忍唔到講：「你玩爛我個鎖，我就開你波」

惟個阿媽係直接叫個仔出去，著佢同出面啲姐姐玩

卒之要兩個姑娘做門神咁擋住度門，個仔就喺度爆喊𠼱地，又要人哋出動玩具去陪小朋友玩，叫做稍為安靜落嚟

我見到個小朋友咁，其實應該好同情佢媽媽，照顧佢應該好攰好辛苦，但見到個阿媽個樣，我又覺得佢真係睇得幾開，似乎係唔諗住教，直情覺得佢想宣告：「我教唔掂㗎啦，等外人嚟教訓我個仔啦！」

小插曲：阿媽帶個仔去完廁所返出嚟，阿媽問佢個手提電話去咗邊？（有另一部應該係俾個仔玩嘅）
個阿仔答佢：「我扔咗落垃圾桶啦！哈哈~~」
個阿媽立刻咆哮衝返去廁所搵，邊行邊鬧：「衰仔嚟！」
個仔喺後面冇跟上去，等個阿媽走遠咗之後，個仔好開心咁笑：「我講笑扔落垃圾桶咋嘛！」
唔知佢阿媽係咪真係摷咗垃圾桶呢？

讀者投稿@星空下的媽媽