#ParentLicenses2590

早上七點幾，我喺金鐘一上車已經聽到有人開住部電話大大聲喺度睇片，原來係一個著住國際學校校服，年約十歲嘅學生妹

因為真係好撚嘈，所以附近嘅人都望住個女仔。直至過咗一兩個站，我終於忍唔住行埋去同佢講：「There’s something called earphone on this planet. Can you lower your phone’s volume？」

個女仔都即刻好聽話咁較細聲啲，與此同時，企喺佢前面嘅阿叔出聲：「阿女， 佢同你講咩？」

我喺呢刻先知原來嗰個五十幾歲，企喺個學生妹前面嘅阿叔就係佢老豆，而佢個女係識廣東話嘅

我：「我同你個女講，叫佢部電話較細聲啲，公共交通工具嚟，嘈住人呀！」

人哋老豆（望住個女）：「女呀，我哋掉位啦，佢可能係有啲問題」

最好笑係，佢個女擰頭話唔掉之餘，重用腳踢佢老豆幾嘢（一睇就知無家教）

人哋老豆（依然望住個女）：「唔係喎，佢可能有精神病！」

我：「先生，你咁樣教女㗎？唔識教唔好生啦！而家講緊佢部電話嘈住人，叫佢較細聲啲呀！」

人哋老豆繼續同個女講：「咁我自己行去第二度，你繼續喺度坐」

然後人哋老豆真係自己走咗，一路行一路口噏噏話我有精神病，可能拎刀斬人之類

人哋老豆呀，即係如果我真係有精神病會拎刀斬人，你係會自己走咗去由得個女俾人斬？同埋麻煩你記住，唔係你有錢俾個女讀國際學校就等同有教養

讀者投稿@白卡婆