#ParentLicenses2558

有一件事約莫喺兩年前，我同屋企人去完迪士尼玩後搭港鐵離開，喺南昌站轉車時發生。當時我哋排喺頭位，架車一開門我哋又搵到位就坐低咗

當時坐我屋企人隔籬嘅就係一個大約七八歲嘅混血兒小朋友，同埋企喺小朋友隔籬個華裔媽媽。一開頭都相安無事，跟住一路坐，個小朋友就愈坐愈埋，而且側住個頭咁睥住我哋，我重聽到佢個媽媽同佢講：「keep staring」

個小朋友又真係聽佢阿媽話，隨即再側個頭埋嚟，碌大對眼咁睥實我哋。我覺得好奇怪就望一望個小朋友，點知又聽到個阿媽繼續叫個小朋友睥實我哋，咁就可以有位俾佢坐喇

我忍唔住用英文問個阿媽：「發生咩事？點解要叫小朋友睥住我哋？」

個阿媽就用英文答返我哋：「大家都喺同一個站上車，但個小朋友唔明點解你哋有得坐，而媽咪要企喺度無得坐，所以佢問我可以點樣同媽咪一齊坐」

我聽完真係呆一呆，唔識應佢

個阿媽隨即又怪我屋企人，指責明知隔籬就係小朋友都無理到就坐低咗，搞到小朋友無得同媽咪一齊坐而唔開心

我屋企人聽完佢講就話：「如果你開聲問會唔會好過叫個小朋友睥實人呢？」

誰知個阿媽就跳制鬧我哋：「Hong Kong bitch!」

我屋企人不忿，遂同佢對罵。我雖然覺得好莫名其妙，但見到個小朋友好似受驚咁，就同佢講：「唔好意思，使唔使讓俾你坐」，打算息事寧人就算。點知佢又鬧咗我一大輪，但因為車廂入面都幾嘈下，淨聽到佢又鬧我係Hong Kong bitch。到何文田站時，佢臨落車又對住我哋舉中指又鬧多句bitch，小朋友就跟住佢爸爸落車

原來個爸爸一路企咗後少少嘅玻璃位度望住呢齣鬧劇發生

就算隔咗咁耐，有時諗起都覺得有啲無奈同嬲，玩完開心完，無啦啦被人鬧之餘，重要被屋企人怪點解要同個女人道歉😅

讀者投稿@HK Bitch