#ParentLicenses1459

基督徒家長，也不過如此

我有個返開的教會團契，最近因為好耐冇見，搵咗個藉口約咗一次聚會，有啲好耐冇返的團友都出席，仲一家大細嚟，咁耐無見，聚下舊真係幾開心

由於出席者當中有兩對父母，話題就好快俾佢哋主導，我哋幾個單身就無乜得搭嘴

教會內人有大有細，其實都好正常，我本來都唔太介意。只不過，嗰對育有幼兒嘅父母得意忘形咁大談「育兒理念」，我聽完佢哋套論述後，覺得心裡唔好過，衝擊我咁耐以來的價值觀

當中一對夫婦倆眉飛色舞講要「及早培養」小朋友，要學好多嘢

夫婦：「而家買咗車，送小朋友周圍去仲方便」

續：「學鋼琴？無鬼用啦。學豎琴？都嫌太普通。學劍擊？而家個個一窩蜂學邊夠特別？最好就冷門啲，咁先可以寫落CV，第日送個仔去名校㗎嘛」

我心諗：「小朋友而家先兩歲，咁快就話要『及早培養』，咁唔知你兩位有無贏在上床前，未造人就早早計劃定哩樣嗰樣？」

其實在座（包括我）一共有兩個司琴，都係無償服務咗教會多年。言下之意，係咪即係覺得我哋好廢？彈琴無鬼用，定係覺得免費幫教會彈琴一啲價值都無？司琴表示真係難過

另外，我就而家好大個先學管風琴，相信哩樣嘢夠晒冷門，於是我就問佢哋

我：「不如跟我一齊去學管風琴啦，夠冷門夠特別啦啩？」

不過佢哋又唔出聲

後來，我將哩個論述向牧師提過，牧師反而笑我太傻太天真

牧師話：「點會有人學管風琴丫，邊有咁多場地有呢樣樂器，個仔學咗都無得表演無得威，不符合成本效益」

話題漸轉去入讀名校有乜嘢策略、小朋友CV要寫乜嘢、課外活動要乜嘢先有亮點有著數……繼續興高采烈

我平靜咁講咗一句：「其實我覺得自己真係普通過普通，彈琴唔係特別叻，成績唔算最出眾，我到今日都唔明點解會入到暴大」

同時間，我暴大同學都在座，佢幾年前搞掂埋PhD。我估佢都無興趣回應呢啲人

哩個同學，我唔覺得佢自小十八般武藝，咪又係普通家庭成長。我識佢咁多年，亦唔覺佢有被催谷嘅跡象，公開考試成績都係正正常常，唔係拔尖入大學嗰啲人。我知佢一直都認為夠用就得，唔使過份追求

其實而家歪理橫行嘅世代，個個都擔心小朋友被洗腦，習染唔正確價值觀，將來唔做好人等等

作為父母（尤其基督徒父母）唔係應該更加要先去建立小朋友正確價值觀，等佢長大識得行公義好憐憫，唔會咁功利，唔會隨波逐流？

散會之後，雖然係覺得個心好唔舒服，覺得好衝擊我信仰俾我嘅價值觀，但係諗深一層，我又覺得有三件事值得講返句恭喜：

第一，就係恭喜自己唔係呢啲人嘅兒女

第二，係恭喜自己無嫁畀哩啲人 ，誓神劈願我一定唔會揀哩種人

第三，係恭喜佢哋搵到好夾嘅另一半，一齊催谷個小朋友追逐哩啲嘢

祝佢哋家庭美滿

當時仲有一對導師都在場，望住班友仔笑而不語。據悉，佢哋兩位分別之前有屋企生意同埋銀行優差，可想而知佢哋收入屬天文數字，不過兩位都放下工作去神學院，然後牧會

電影截圖@古惑仔
讀者投稿@管風琴學生