#ParentLicenses2523

我最近幫人上門補習，遇到個好鬼難頂嘅男仔。我從來都未遇過咁恐怖嘅細路

個細路讀緊小一，上個禮拜教佢第一堂，一入屋就聞到好大陣尿味，但由於我嘅職責係幫細路補習，所以冇理會。開頭佢係咁坐唔定，不過呢啲情況我都預料到，有耐性咁教佢坐返好

補習中途個細路仔同我講：「我要屙wewe」

補習期間想去廁所係人之常情，我咪俾佢去。點知佢冇入去廁所，而係跑咗去鞋櫃隔離嘅水桶，除低晒成條褲開始屙尿😫

佢阿媽可能聽到屙尿聲，就喺間房入面行出嚟話：「XX（細路個名），你喺度屙wewe呀？嚇親姐姐喇，下次入去廁所屙啦！」

個男仔屙咗半分鐘左右先至屙完，點知佢屙完之後唔著返條褲跑過嚟

佢阿媽就嗌：「你快啲著返好條褲啦！」

然而，個細路仔無理會佢阿媽，係咁喺度笑；個阿媽又好似複讀機咁，只係將嗰句重覆嗌咗幾次，都係冇即刻幫佢著返條褲，係個細路笑完佢先自己著返條褲

之後，細路嘅阿媽攞咗個水桶入廁所倒尿，然後將水桶擺返原位，好似重繼續俾佢咁樣屙

我真係嚇死，雖然自細已經見過啲細路仔周圍屙尿，但今次係最嘔心嘅一次，到而家個畫面仍然歷歷在目。個細路已經讀緊小一，無理由唔識用馬桶屙尿，而且係當住一個女仔面前屙，屙完又唔著返條褲，喺度條條揈。其實當時細路仔爸爸都喺間房度，但佢聽到反而喺度笑

細路嘅父母好似唔覺得呢個行為好有問題，而且由頭到尾一句「唔好意思」都無，所以落堂後我決定唔再補佢，今個禮拜我搵藉口成功推走晒佢

不過而家我諗緊受害者會唔會唔止我一個，我咁做會唔會又有其他受害者出現？

讀者投稿@Winifre