#ParentLicenses1450

話說有日返舊屋食飯（親人住公屋），喺大堂等𨋢時，遇到一家三口

哩三口有一個睇梗電話嘅媽媽，一個扭計中嘅細路（目測4-6歲），仲有一個工人姐姐

個細路喺大堂已經係咁扭計，不斷打同推工人姐姐，而個媽媽一直冇理

跟住𨋢到

工人姐姐當然拖呢個扭計中又唔肯入𨋢嘅小朋友入𨋢，入到𨋢後，小朋友更加唔憤氣，繼續大幅度咁扭動佢嘅身體同揮動佢嘅手去打工人

我望見工人姐姐個樣好無奈……工人只係不斷縮，任由佢打，應該已經慣咗

架𨋢空間細，個小朋友差啲打到我，甚至搞到我都要縮開

事情發展到而家，個媽媽全程都冇理過佢，冇出過一句聲，唔知情人士仲以為佢哋係唔識

我望住小朋友出聲：「小朋友你唔好打到我」

個細路聽到即刻停咗唔郁，個樣好委屈同驚，縮喺工人姐姐後面

噢！原來個細路聽得明人話，係識停㗎👍🏼

呢個時候個媽媽終於有反應啦！

首先，個媽媽怒睥住我，再睥住工人呼喝：「Nana你有冇見到佢打到佢？！」

Nana（音）應該係工人名

個媽媽再大聲啲續道：「我問你吖！你有冇見到佢打到佢吖？！！」

工人唔敢出聲，低頭笑笑就算

個媽媽之後再睥住我，然後同個仔講：「都話唔嚟呢啲地方㗎喇（公屋）！係你成日都話要來探xx，下次丫！唔會再嚟！」

咁啱呢個時候佢哋嘅樓層到，𨋢門開，呢位媽媽氣沖沖咁出𨋢

你覺得嚟公屋探親咁委屈你，但你又會有親人住呢度而個仔又咁想探嘅？咁即係你睇唔起你親人啦💁🏻‍♀️

唔係含住金鎖匙出世嘅人，而係香港而家有公屋住嘅人先係人生贏家💁🏻‍♀️

Btw，生仔唔教仔，你住邊都冇用

讀者投稿@TBB