#ParentLicenses2463

呢件事喺我大概十一二歲左右嘅時候發生，但我直到而家三十幾歲，我都仍然未能夠忘記釋懷，每次諗返起，我條氣都好唔順，好唔gur。當年屋企有三房一廳，自細一家四口一齊住，有爸爸、媽媽、阿哥，重有我呢個細妹，然而有一日有一個大陸嘅姑姐過嚟香港住一排，加插多個人入嚟住，即係要讓其中一間房俾佢。頭幾日大家都相安無事

直至唔知道佢住咗第幾日，我同佢講：「姑姐，我落街買少少嘢，我唔帶鎖匙，你轉頭開門俾我得唔得？」

個八婆答我：「得，你落街啦」

以上嘅對話，咁大家應該都好明白啦，但直到我買完嘢返嚟屋企，撳咗門鐘一下，冇人行過嚟，我再撳第二吓，又冇人行過嚟，之後我就已經覺得好奇怪，會唔會係姑姐喺裏面有咩事發生。我隨即再連續撳幾下門鐘，姑姐先施施然出嚟開門，我嗰刻我重以為佢係咪頭先發生咗啲咩事，未開門俾我

我擔心佢：「姑姐，頭先係咪發生咗啲咩事？所以你開唔切門俾我？」

佢答：「我點知邊個撳鐘撳得咁頻密，我都行唔切過去，咁我咪唔開門囉」（其實屋企係有防盜眼，可以睇到出面）

你哋冇睇錯，我亦冇打錯字，條八婆真係咁樣答我，我到而家都重係好記得佢講呢句說話嘅嘴臉

有陣時我真係唔明啲人，做人親戚，或者你做人親戚，住喺人哋屋企，竟然可以擺出好似成個大爺大小姐咁款。唔該，寄人籬下就要有寄人籬下嘅態度，你已經介入咗人哋屋企嘅生活，重要俾說話人哋嘅小朋友聽，唔知作為父母嘅你哋會有何感想？

我將呢件事同返我媽咪講，我阿媽竟然同我講：「姑姐唔係成日過嚟住，咪忍吓佢囉」

我嗰刻我好愕然，點解佢過嚟我屋企住，唔係佢接受人哋家庭嘅生活習慣，而係要人哋去遷就佢？點解你哋作為父母，可以咁委屈自己個小朋友咁樣去俾啲親人欺凌佢？點解講件事出嚟俾你哋聽，都係要我去體諒人哋？

真係唔該呢啲父母唔好有下一代，你哋係縱容緊你哋嘅親人去欺凌你小朋友，甚至乎要叫佢唔好去反抗，咁樣只會加重佢嘅懦弱，出到嚟社會俾人欺凌，唔識還手，就好似我咁

另外，如果你哋本身屋企已經唔係好有錢，甚至已經可以用「窮」黎形用，真係唔好生下一代，因為我父母細個嘅時候成日喺我耳邊講：「因為要養你哋，我已經借咗邊個親戚錢，即使佢哋俾說話你哋聽，忍下口，冇佢哋借錢俾我哋，就冇你哋小朋友出世之後嘅生活」

因為你哋借咗人哋錢，作為小朋友嘅我，就要活該俾你啲親戚當出氣袋咁鬧？其實係你哋父母借人哋錢，到頭來點解係要小朋友埋單成為人哋嘅出氣袋？係咪小朋友俾人鬧完，你哋父母就可以還少啲債？每次俾人鬧完，都要被落井下石：「你屋企人借咗我錢，你忍吓啦，叔叔飲大兩杯，你唔好擺喺心」

其實重有更多事例不能盡錄，中文唔好，打到上文不接下理，惟多謝大家聽我呻，多謝大家耐心睇完

讀者投稿@小番薯