#ParentLicenses2458

大家有無諗過，偏心嘅父母對所有嘅仔女都會造成傷害？

本人生於一個重男輕女嘅傳統家庭，對我嚟講童年只有痛苦。諗返細個嘅日子，我係無任何被愛嘅回憶，只係記得每日不停重複被打，亦經常被言語羞辱

即使一直同屋企人一齊住，我由細到大都被逼自己獨立；即使遇到任何困難，都唔會有人幫忙

長期被虐待嘅日子，令我每一日都自我質疑「到底我出世係為咗啲咩？」「我重存在喺呢個世界有咩意義？」甚至覺得即使有一日我消失喺呢個世界，都唔會有人在乎

讀緊小學嘅時候，有一晚我打開窗，想了結咗自己就算。但我唔敢，所以當時我選擇將傷心變成恨意，告訴自己：「我會長大成為一個好叻嘅大人，將來你哋會後悔今日咁樣對我」

當時嘅我應該想像唔到多年過去之後嘅我，雖然已經係當年自己期望成為嘅一個獨立嘅成人，但我選擇原諒佢哋，將過去留喺過去

然而近年生活上各種嘅壓力，令我嘅情緒開始影響到身體狀態。於是我開始咗做心理治療，慢慢去拆解童年嘅陰影，從新建立自己嘅自我價值。而好彩呢啲治療對我都好有用，不過條路都真係好長，唔知幾時先會完

「有人用童年去治癒一生，亦有人用一生去治癒童年」我諗我就係後者

我一路以為，由細到大喺屋企入面受盡寵愛嘅男丁係前者，但事實上唔係咁。反而佢哋係因為從小被細心呵護照顧，到而家遇到問題都唔太識依靠自己去解決。好多時撞咗板就坐喺度等人處理，日常生活都係習慣被人哋照顧。重喺屋企嘅時候問題都不大，反正家人已經習慣縱容

情況直到有另一半，日子耐咗，對方忍無可忍然後離開，佢就企喺原地傻傻咁唔明白點解。到見心理咨詢嘅時候，先知道自己原來好多嘢都做得唔啱

深入諗先發現，一個咁唔健康嘅成長環境入面，我哋兩個極端，被虐同被寵嘅兩邊，都有受到唔同嘅傷害，兩邊都需要接受心理治療，去拆解返童年對我哋嘅影響

好希望各位父母，盡量公平啲對待仔女，多啲表達愛同關心，好好咁同仔女建立一個好嘅溝通模式，讓佢哋喺一個有愛而又平衡嘅環境成長。我好希望每一個小朋友，都有一個好幸福嘅童年，可以用童年去治癒一生，共勉之

由於怕被親人認出係我寫，避咗無寫明角色，如果難睇咗嘅話，唔好意思🙏🏻

讀者投稿@Hope